ماتش تاريخي رائع فمؤتمر حزب الاستقلال. شباط وولد الرشيد لا غالب ولا مغلوب. خسر فتمرير التقرير المالي وربح ففرض تصورو وتاجيل المؤتمر وقيادي ل"كود": ما نعيشه معركة ديموقراطية غير مسبوقة فتاريخنا

مؤتمر حزب الاستقلال 17 اللي بقى مفتوح ملعوب فيه ماتش كبير بزاف وديموقراطي بين اصدقاء الامس حميد شباط وحمدي ولد الرشيد. معركة الطباسل اللي كيحاول البعض التركيز عليها فهاد المؤتمر كتبين هاد الصراع لكبير بين التيارين. حتى واحد لحد الان ما قدر يطيح الثاني. معركة تختم اشهر طويلة من الصراع. باش جات غير فالطباسل راه لاباس يقول مؤتمر استقلالي ل"كود" "كان احتمال طيح روح قائمة. باش جات فضريب الطباسل نحمدو الله".
ظاهريا كان اكثر المتفائلين يتوقع سقوطا سريعا لشباط فهاد المؤتمر. غير هاد الناس ما كيعرفوش شباط وقوتو لكبيرة وذهاؤو السياسي. فاليوم الاول كان الافتتاح وكان التقرير الادبي اللي تصوت عليه بالاجماع. هنا شباط دردك وحيح "كلشي كيتفرج ومتأكد باللي كثار كانو غاديين يصوتو لنرار بركة بدلو رايهم ديك الليلة" يحكي مؤتمر اخر استقلالي ل"كود". شباط تكلم عن كل شيء. فرش صحابو. قدم حزبو كضحية لمؤامرة اجهزة الدولة وان الداخلية هي اللي باغية تتحكم فالحزب وتسيرو.
لكن شباط سيفشل حتى في عرض التقرير المالي لولايته. كانت هذه اولى هزيمة له. تيار ولد الرشيد قال انه لن يقبل حتى عرض التقرير لانه معروض الان على القضاء. البارح كان شوية النقاش باش يعاودو يجبدوه ولكن ما عطى نتيجة. هزيمة شباط فهاد الجولة لا تعني هزيمته في الجولة المقبلة. المؤتمرون كانو يتوقعو بدء التصويت على الامين العام اولا ثم اللجنة التنفيذية ثانيا البارح فالليل. وقع التاجيل واليوم فالصباح ناض الصداع وكان الطايح اكثر من النايض. اصحاب شباط يقولون انه لا يمكن تنظيم انتخاب الامين العام وشي وحدين ما عندهم البطائق الالكترونية. كان اللي ما خداهاش وكاين اللي طاحت ليه.
وقع اجتماع بين رئيس المؤتمر نور الدين مضيان وبين اعضاء اللجنة التنفيذية والمتنافسين على الامانة العامة وتم تم الاتفاق على تأجيل انتخاب الأمين العام للحزب واللجنة التنفيذية إلى يوم السبت المقبل بالصخيرات. هاد التأجيل انتصار لشباط على ولد الرشيد
قيادي استقلالي ل"كود" اكد ان ما يعيشه الحزب حالة صحية وتجلي للديموقراطية واضاف ان شباط "ما يمكنش ليه يخلي هاد الشي لجهة وحدة". هذا يعني ان التصويت السبت المقبل ما غاديش يحل المشكلة وبللي خاص يوقع توافق قبل. اي باقي 7 ايام قبل هاد التاريخ. لفراجة مضمونة هاد الاسبوع