الجزائر قررات تقطع علاقاتها مع المغرب.. والمغاربة والمشاهير مطلعينها على الخبر: واش هو الما؟ الأوكسجين؟ انترنت؟ تلفون مول تفاحة؟ لاا .. اذا بلاش منو! -تصاور وفيديوهات

البارح في العشية طاح خبر قطع الجزائر للعلاقات ديالها مع المغرب.
من ديك الوقت لهاد الساعة والمغاربة في مواقع التواصل الاجتماعي طانزين على القرار لي عتابرو المغرب غير مبرر لكن متوقع نظرا للتصعيد لي دارتو الجزائر في السيمانات الاخيرة.
وبزاف ديال المشاهير لي عندهم ملايين المتابعين ختارو يطنزو بطريقتهم على القرار، بحال الرابور عمر السهلي المعروف بديزي دروس لي حط تصويرة ديال العشا ديالو وكتب "عتقونا بشي صوص آلجيريين راحنا كنموتو".
والمغنية المغربية رجاء بلمير لي عندها كثر من 8 مليون متابع في حسابها على انستكَرام، حطات مجموعة ديال الستوريز بالتصاور والأغاني فيهم الدق ودوزات الميساج بالفن وبطريقة ذكية.
المغنية رقية ماغي لي مستقرة في الامارات حطات فيديو مشهور في تيك توك كيقول "واش هو الما؟ الأوكسجين؟ انترنت؟ تلفون مول تفاحة؟ لاا .. إذن بلاش منو".
الصحافية بشرى ضو جمعات مقطع ديال فيديو أصالة ملي قالو ليها أن أحلام بلوكاتها وطنزات قالت "من نهار بلوكاتني مجاني النعاس، لدرجة شوفي وجهي كي ولا حالتو". وحطات ضو حتى أغنية راغب علامة لي كيقول فيها "لي خرجت من حياتنا عمرنا نسولو فيه".
المانكان هند سدادي كتبتات "شكون داها فيك يا الزميطة نهار العيد"، وواحد الأغنية كتقول "باي باي بسلااامة عليييك.. شكون عقل عليها نديروها ليهم اهداء ".
وكيبقا الفيديو لي سيركولا بزاف في الأنترنت بين المغاربة هو مونتاج كيبان فيه دري صغير كيبكي ومكتوب "بقينا بلا تبون".