بارمان ل"گود": كنت كنصوت على بنكيران حيث عندو الكلمة وهاد العام عاقبت البي جي دي وعطيت صوتي للحمامة وها علاش

المفاجأة للي كانت فهاد الانتخابات غير عادية، والمتعلقة بحصول حزب الاحرار على 3 مليون صوت تقريبا، عندها مبررات كثيرة، منها التصويت العقابي على بي جي دي بنعرفة وصحابو.
"گود" هضرات مع شيفورات طاكسيات صغار ومع عدد من المستخدمين فالمقاهي والبيران، كلهم تقريبا كاعيين على العدالة والتنمية، اغلبيتهم صوتو على بنكيران ف 2016 ضدا ف البام وضدا فمسيرة ولد زروال. ودبا عاقبو البي جي دي.
بارمان هضر مع "گود" وقال بصريح العبارة انا والوالدة كنا كنصوتو على العدالة، ودبا عاقبناهم، حيث خواو ب بنكيران، ومبقاتش فيهم الثقة، وزيد على ذلك، انهم محاربوش الفساد ومطبقوش الدستور.
البارمان قال ل"گود": حنا صبرنا واخا الازمة، وقادين نصبرو مع الرجال، ولكن ماشي مع العثماني وصحابو لي بينو انهم مافيدهمش ومقادينش. ودبا بغينا نجربو.