البي جي دي كيقضي على راسو.. كيفاش قولبن البام ومسح ليه ذاكرتو وخدا البراءة فابور

التراكتور قولب البي جي دي، ودار معه اتفاق وشراكة، في سابقة من تاريخ هاد جوج ديال الاحزاب اللي كانو مضاربين، الاول تخلق لمحاربة الثاني، من 2008 حتى 2016 فالانتخابات اللي ربح فيها بنكيران البام.
البي جي دي فعهد العثماني، شفنا كيفاش هاد الحزب انقلب على مسار طويل ديال النجاحات فعملو السياسيي، ودبا دار اختيارات كلها صفقات مع الدولة، قبل بالتطبيع باش يبقا فالحكومة، وقبل بفرنسة التعليم وعدد من الاختيارات اللي ضد هويتهم وافكارهم ومبادئهم.
جزء من هاد الصفقات، هو هاد الاتفاق اللي دار مع البام، طبعا للي رابح فيه هو التراكتور خصوصا مع قرب الانتخابات والاستقطابات اللي دار مؤخرا.
هنا البي جي دي عطا كادو للبام، عطاه البراءة على المسار السيء ديالو. وخصوصا فالبيان هضرو على تخليق العملية الانتخابية. هادي عمرها كانت عند صحاب التراكتور (ماشي كلهم طبعا، وكاينين اللي مدانين فقضايا فساد مالي فالاستئناف باقي غير النقض).
البي جي دي تقولب ورهن راسو وعطا هدية فابور للتراكتور.
هاد الكادو اللي خدا البام، موراه قيادات فالتراكتور اللي تيفكرو مزيان ويخططو ماشي وهبي اللي مهمتو يبان فالواجهة فقط.
قيادي فالبي جي دي هضر مع "گود" قال هذا الموضوع باقي للنقاش وسط القيادة والتحالف مكاينش كاين غير التوافق حول عدد من المبادئ العامة اللي كنأمنو بها فحزبنا، وميمكنش نقبلو بتحالف مجاني، والسياسة كتفرض على عليك دير توازنات خصوصا وان قيادة البام دارت تراجعات.
وجاء في بلاغ مشترك لحزب العدالة والتنمية و"البام"، خلال لقاء جمع قيادتي الحزبين بالمقر المركزي لحزب العدالة والتنمية يوم امس بالرباط، "ان هاد جوج احزاب عندهم ارادة المشتركة للإسهام في إنجاح تلك الاستحقاقات بنَفَسٍ وطني، وللتعبير عن رفض كل الأساليب الساعية إلى المساس بنزاهة وحرية الاقتراعات خصوصا عبر أساليب الاستعمال المريب للمال الانتخابي وكذا استعمال بعض أدوات الترغيب والترهيب ضد بعض الفاعلين الحزبيين، مما يستدعي اليقظة والتدخل الحازم من قبل السلطات المختصة للقيام بواجبها في صون الانتخابات المقبلة من عبث العابثين".