أحسن حاجة هي تحيد مادة التربية الاسلامية من المقرر كامل ماشي غير الامتحانات الإشهادية ! أو تولي مادة اختيارية ! و يتم تعويض الساعات ديالها باللغات او المواطنة او البرمجة او الموسيقى او أي حاجة تقدر تفيد التلميذ فصناعة الشخصية ديالو !

ماعمري مافهمت الصراحة علاش كانقراو التربية الاسلامية و شنو الفائدة ديالها ؟ و علاش واحد علمي مثلا باغي يدير الطب او مدرسة المهندسين مفروض عليه يقرا التربية الاسلامية و احكام الارث و التعصيب !
كاين لي غايقول ليا باش نعرفو الدين ايوا المغاربة مسلمين آش بغيتي تعرف اكثر ؟ كاين لي غايقوليك التربية الاسلامية كاتعلم التلاميذ الاخلاق و القيم الاسلامية ! انا ماكانشوف بو اخلاق و بو قيم بالعكس المستوى الاخلاقي ديال التلاميذ و ديال المجتمع بصفة عامة في انحدار و التربية الاسلامية مانافعانا فوالو ! الدراري ماكايحتارموش الاساتذة ! مستوى الغش فالامتحانات يفوق التصور حتى امتحان التربية الاسلامية كاتشبك فيه نقلة و القرآن براسو كايتحجب ! و بالنسبة لسوق الشغل ماغاتنفعش التلميذ يصور طرف د الخبز بيها ما عدى لاكان كايطمح يولي فقيه مشارط فشي دوار.
طبعا كاين لي كايسمع "نحيدو التربية الاسلامية" كايصحابو " نحيدو الاسلام" واخا فرق كبير بين الجملة الاولى و الثانية ! راه الله سبحانه و تعالى قال " إنا أنزلها الذكر و إنا له لحافظون " يعني الله قاد بشغلو و المغاربة مسلمين الحمد لله و عارفين الدين ديالهم مامحتاجينش يقراوه فالمدرسة ! و ثم انه اصلا اليوم و مع تنوع وسائل المعرفة أي واحد حابب يتفقه فالدين راه موجود الموسوعات و الكتب فالانترنيت و يمكن طيليشارجيها بشكل مجاني و كاين الجوامع الحمد لله !
و تفكرت بلي هاد العام وانا كانتناقش مع واحد التلميذ من العائلة غايدوز الجهوي قاليا " علاش مفروض عليا ندوز امتحان فالتربية الاسلامية واش انا غانكون فقيه ؟" الصراحة السؤال ديالو صدمني و لكن فرحت بلي هاد الجيل عندو الجرأة يطرح فحال هاد الاسئلة لي فالوقت ديالنا كانت كاتبان من الطابوهات! و فاش فكرت فشنو قال لقيت بلي عندو الحق ! المدرسة ماخاصهاش تفرض على الدراري التربية الاسلامية ! و لا أي نوع من التربية الدينية حيت الدين بلاصتو خاصها تكون فالدار و فالجامع ! و المدرسة يتعلم فيها التلميذ مواد لي تنفعو فعلا فحياتو ! اللغات مثلا ! العلوم !البرمجة ... هادو مواد غايعاونوه يكون واجد لسوق الشغل ديال 2030 فما فوق ... و لا الموسيقى و لا المسرح مواد لي كاتعاون فبناء شخصية متوازنة ذات حس فني ! هادو هوما المواد لي محتاجاهم المدرسة المغربية و التلميذ المغربي ! ماشي مات رجل و ترك سبع بنات وولد حسبو الورث لي غايجي لكل واحد فيهم واش هادو تلاميذ و لا عدلان ؟