لا مايمكنش البارح تقبل بالتعاقد و اليوم تجي ترفضو و تطالب تخدم مع الدولة باش دكو فيها حياتك كاملة! باراكا لي دكوه فيها قبل منك و وصلو التعليم لهاد المستوى المتدني

التعليم فالمغرب داير كي راس القرع فين ما قستيه يسيل دمو ! قربتي للمقرارات غاتلقاها عامرة بالحشو و المواد لي كاضيع الوقت للتلميذ ، بغيتي تشوف اللغة ديال التدريس غاتلقاها ما هي اللغة الدارجة لي كايهضر بيها المتعلم ماشي شي لغة اجنبية كاتحمر لوجه ! اللغة العربية الفصحى لي أكل عليها الدهر و شرب و لي ماغاتعاون المتعلم لا يدير البحوث ديالو لا يلقى خدمة من بعد ! طليتي على الاقسام غاتلقاهم مدبوزين بالتلاميذ ! بغيتي تعرف مستوى الاساتذة سير شوف شكون كايدفع للكونكور ديال التعليم و بشحال ناجحين فالباك غاتلقا اغلبهم من صحاب باك بمقبول !
طلع ليك الدم و قلتي آجي نطل على القطاع الخاص نشوف شنو طاري فيه ! غاتلقا الدقة ع النيف ! ماكاين غا حلب حلب حلب فالواليدين ! و واخا الجودة كاتبقا نسبيا احسن من القطاع العام و لكن ماشي شييييي جودة عاوتاني اغلب المؤسسات دايين غير الشنعة ! و اغلب التلاميذ كايقراو فالاقسام و كايزيدو السوايع فالدار و هاكاك فاش كاطل على النتائج كاتلقا نسب النجاح ماكاتشرفش ! و وسط دوك نسب النجاح قلة قليلة لي كاتنجح بالموسيو و كايكون عندها استطاعة تساير فمدارس عليا و كليات كبيرة فحال كلية الطب … الأغلبية الساحقة كاتلاح فلافاك فدوك الشعب فحال التاريخ و الجغرافية ! الآدب العربي ! الدراسات الاسلامية …. و لي كايعاودو يتخرجو من هاد الشعب تاهوما بدورهم كايدفعو للكونكور ديال التعليم ! و كانبقاو ندورو فحلقة مفرغة ! اساتذة بمستويات هزيلة ! كايعطيونا تلاميذ بمستويات هزيلة ! لي كايقلبو على الوظائف لي غاتقبل عليهم بمستوياتهم الهزيلة و لي كايجي على رأسها التعليم !
طبعا ماشي غير المستوى ديال الاستاذ لي كايأثر على المتعلم و لكن كايبقا المستوى ديال الاستاذ واحد من اهم العوامل لي كاتحدد مسوى التعليم فالبلاد.
هاد الأيام الاساتذة المتعاقدين محيحين على الدولة ! قالك آ سيدي مابغاوش التعاقد صافي ! بغاو يخدمو فحال الاساتذة الاخرين و يوليو موظفين ! علاش هادشي ؟ لحد الساعة ماشفت تا شي رد او بيان لي كايعطي الاسباب ديال هاد الخرجات الاحتجاجية!
ولكن هادشي ماغايمنعنيش نسطل بسطلي فهاد الموضوع !
اولا انا ماشي ضد انه الدولة تخدم اساتذة اكثر لي تسد بيهم الخصاص الحاصل ! انا عارفة بلي الدولة غير كاطبق البرامج ديال صندوق النقد الدولي لي كايسلفنا الفلوس و كايشرط علينا مانخسروهمش فخلاص الموظفين بل نستثمروهم باش نخلقو فرص شغل و نحركو الرويضة ديال الاقتصاد ! و لكن واخا هكاك كانرجع نقول بلي خاص يتزادو الاساتذة و يتوظفو و يتعطاوهم صاليرات مزيانين باش يقدرو يخدمو مزيان !
باش غانديرو هادشي ؟ باش غانوظفوهم و نخلصوهم و نتهلاو فيهم ؟
ماعرفتش ! ماقلبتش الصراحة فهاد الموضوع بزاف و لكن كانظن الوزارة المعنية بالامر راه فيها الكفائات اللازمة لي تقدر ضرب الحساب و تشوف بشحال غايتقام عليها هاد البلان و كيفاش تقدر تخرج ليه الفلوس !
و لكن ! فاش كانقول هاد الهضرة ماكانقصدش الاساتذة طروازيام ديفيزيون ! ماكانقصدش لي مشا يدوز الكونكور ديال التعليم غير حيت سقط فالكونكور ديال البوليس و الجدارمية و الاعوان القضائيين ! و ماكانقصدش لي ناجح فالباك بمقبول و صحاب الاجازة بمقبول و الماسطر لي ماكايسوى تا خرية !
كانقصد جيل جديد ديال الاساتذة لي يكونو من خيرة التلاميذ ديال هاد البلاد ! و يمكن گاع يكونو ناس من مدارس عليا فحال مدارس الهندسة و مدارس التجارة و لي عوض مايتوجهو للقطاع الخاص يخدموا فالتعليم نيت، بصاليرات محترمة و امكانية التدرج فالوظيفة بشكل اسرع من لي كاين دابا ! باش يولي التعليم كايجيو ليه الناس لي عندهم الكفاءة باش يقريو و باغين يقريو ! ماشي يجي ليه غير هاداك لي زربان باغي يتوظف دغيا و لا غير هاديك لي سقطات فالكونكور ديال البوليس و الجدارمية و لا غير هاداك لي جايب الباك بالدفيع ! و هاداك لي ماقادش يخدم فالقطاع الخاص حيت عارف راسو مطالب بالمردودية و لاماكانتش المردودية غايتريو على باباه !
راه طالما التعليم جامع نسبة مهمة من اليائسين و متوسطي المستوى و صحاب النقط الضعيفة و باردين الكتاف لي ماقادينش على القطاع الخاص! ماعمرو غايزيد القدام حيت فاقد الشيء لا يعطيه ! حيت خاصك تكون كنتي تلميذ متفوق باش تعرف تصنع تلميذ متفوق ! خاصك تكون قراي باش تصنع القراية !
)طبعا كاينين اساتذة اكفاء و فالمستوى قراونا الله يرحم واليديهم و لكن كايبقاو قلة قليلة)
علاش المتفوقين كايمشيو لكليات الهندسة و التجارة و التسيير و الطب و تالادارو التعليم كايديرو التعليم الجامعي ؟ راه باينة على ود الگرمومة بشكل مهم ! حيت واحد عندو الامكانية يدير مدرسة المهندسين و يخرج منها يدخل يخدم بعشرالاف درهم ! ماشي حمق يختار يدير التعليم و يدخل يخدم بخمسالاف و لا ستالاف درهم ! و مايتزاد فالسلم حتى يعواج ! و مايزيدوه ديك الالف درهم تا يشرف ….
الحل ديال التعليم ماشي فادماج الاساتذة المتعاقدين الحاليين! لجوج اسباب ! السبب الاول هوا القوالب لي بغاو يخدمو ! هاد الناس النهار الاول قبلو بالتعاقد ! و العقد شريعة المتعاقدين ماليها تا معنى ينوضو يغوتو دابا لا مابقيناش بغينا التعاقد و يديرو العصا فالرويضة !
ثانيا لاكاين شي ادماج خاصو يكون للاساتذة الاكفاء و يكون فعلا الانتقاء مبنى على النقط و مباراة كتابية و شفوية فحال المبارايات ديال المعاهد العليا و يكون المقابل المادي و الترقي فالاسلاك الوظيفة محفز باش يجيو هاد الناس للتعليم !
اما اصلاح الخطأ بخطأ ! و إدماج اساتذة جداد متعاقدين غير باش يتسماو تم ادماجهم فسلك الوظيفة العمومية بديك العقلية ديال ” كلشي باغي يدكو فالدولة” ! فهادشي راه هوا الانتحار بعينيه !
راه كيما الطبيب خاصو يكون جايب الباك بمونسيو و كايدوز من عين البرا باش يتخرج طبيب حيت حياة الناس بين يديه
تا الاستاذ خاصها تولي مهنة نخبوية بدرجة انتقاء عالية حيت دماغ التلميذ بين يديه
و ديك الساعة ! تا لا كانت شي مطالب و زيادة فالاجور راه جات معاهم.