مباراة مفصلة لثلاتة ديال الناس ف جامعة ابن زهر: امتحان جديد للوزير امزازي.. واش غادي يتدخل ويوقف هاد الفضيحة؟

في كلية الآداب والعلوم الانسانية بجامعة بان زهر، داز واحد الكونكور نهار 5 غشت دار واحد الضجة ماعمر دارها شي كونكور قبل منو، حيث المتضررين كايأكدو بلي داكشي مخدوم شحال هادي باش الكلية توظف ثلاثة ديال الناس كانوا شحال هاذي خدامين فهديك القناة نيت من العام الفايت قبل مايخرج الكونكور.
المباراة دازت نهار 5 غشت والشفوي نهار 6 غشت، للتباري على منصب (1) في الإعلام ومنصبين (2)في تطبيقات الإعلام. داز كثر من شهر وخرجو النتيجة النهائية للكونكور ديال "تطبيقات الإعلام"، لي بغاو فيه جوج، لي هوما نيت دوك الناس لي خدامين في القناة شحال هادي.
وبقا الكونكور لاخر لي حتى هو النتيجة ديالو محسومة لواحد السيدة، ولكن ماخرجوهش حيث واحد جاب ليهوم مفوض قضائي وطعن في النتيجة من المرحلة ديال الكتابي باقي ڭاع مدوزو الناس الشفوي. وبغا باش تجي لجنة تفتح تحقيق فهادشي لي وقع.
ولكن شكون غادي يفتح تحقيق إلا كان أمزازي براسو زار هاذ القناة الرقمية قبل الكونكور وتلاقا بهدوك اللي خدامين فيها هو ودريس وعويشة، وفي 19 غشت ملي داز الكونكور تلاقا تاني فالكلية بهدوك نيت لي دوزو ودار معاهم برنامج كايهضر فيه على نظام الباشلور، وبقات الحلقة مقادة حتى لنهار 22 شتنبر عاد دازت.
إتحاد الطلبة في الأقاليم الجنوبية حتى هو دخل على الخط، وجبذ بزاف ديال الضواسا في بلاغ صحفي وقال بلي داكشي كلولو مخدوم ومفصل لثلاثة ديال الناس هوما لي غادي يدوزو، وراه دازو.
لي مامعروفش هو واش أمزازي داخل حتى هو فهادشي وعارف حيث راه كان فهاذ القناة قبل المباراة وبعدها، ولا غير استغلوه المسؤولين ديال ابن زهر باش يعطيو الشرعية للمباراة، كيما استاغلوا شحال من واحد شاركوا من نيتهم في المباراة، ومنهم أسماء صحفية معروفة، لي شارك فمباراة خاصة بالإعلام بالعربية، ولكن لغاوها ملي كثرات الهضرة، حيث لي فكرشو العجينة ماينعس نعسة زينة.