ايت الطالب الوزير اللي كيكرهوه لمغاربة. قرارات عشوائية واجراءات غريبة وتحدي لكلشي ورفض مراقبة البرلمان ليه

داك المشهد البارح ديال بوليسي تابع مواطنة كيسولها على الباس ڤاكسينال فالرباط ماشي غريب بل سوريالي. علاش ممثل السلطة كيسول مواطنة فالشارع على هاد الجواز اللي لحد الان كيهدرو على الادارات والمؤسسات والتنقل من مدينة لمدينة ماشي لخروج من الدار ...
هاد المشهد وصلنا ليه بسباب وزير الصحة خالد ايت الطالب. علاش التركيز غير على هاد المسؤول اللي فشل يدبر مستشفى جامعي ففاس وعطاوه وزارة؟ حقاش الحكومة يالله بدات وهو جا فالنهار اللي اطر الوزارة دارو وقفة قدامها كيطالبو باش يحاسبوه هو ودير مديرة مديرية الادوية.
يعني هاد لوزير كان فالحكومة السابقة جا مع هاديك الكذبة ديال "حكومة الكفاءات" ومن زهر لمغاربة لعوج تصادف وجودو فالصحة مع "كورونا فيروس".
الطريقة باش كان كيدبر بيها التعامل مع هاد الوضعية الوبائية غير المسبوقة كان ديما ارتجالي. الداخلية وجدات كلشي خاصة الجانب التقني باش دوز عملية التلقيح مزيانة وهو كيتبندر وكيقدم راسو هو مول كلشي اللي دار.
دابا حتى الجانب التواصلي ديما فاشل فيه هاد المسؤول اللي عندو شي ركيزة صحيحة باش يستمر فمنصب وتزادو "الرعاية الاجتماعية" كاع. وزير ديما همو يدخل فمعارك مع ناس القطاع. فقمة الازمة ديال كورونا كان ايت الطالب مسكون باقالة عدد من المدراء الجهويين والاقليميين. فالوقت اللي كانت الصفقات لكبيرة كدافع وباش جات لجان استطلاعية تعرف اش وقع وكيفاش دارت هاد الصفقات٬ كان كيوظف شي برلمانيين باش يقبرو نتائج هاد اللجان.
لحد الان راهم مازال فالبرلمان ودابا نشوفو اش غادي يدير بيهم البرلمان الحالي.
كيف قلنا المشهد العبثي ديال البوليسي كيطلب من مرا الباس ڤاكسينال البارح الاحد فالشارع٬ وصلو لينا هاد لوزير. بكل ارتجالية قرر فرض هاد الباس. بكل ارتجالية قرر فرض الجرعة الثالثة. فالعالم المتقدم فالطب وفالديموقراطية هاد الجرعة مخصصة لفئات بعينها بحال الناس لكبار فالسن وللي عندهم امراض مزمنة... يعني اللي ختارعو هاد اللقاحات ما فرضوهاش. اللي ختارعو الباس سانيتير ما فرضوهش حتى فالسفر ما بالك بمصادرة حق دستوري لمواطنين بالتوجه للادارات لقضاء اغراضهم.
عبثية هاد المسؤول انو رون كلشي. رجع باش ينتاقم ماشي غير من الحكومة اللي هو جزء منها بعد عبثية اعفاء نبيلة الرميلي اسبوع من تعيينها٬ بل ينتاقم من كاع لمغاربة.
ان تقرر الدولة او الحكومة فرض الباس سانيتير هادا معمول به فدول كثيرة. لكن هاد الفرض ما كيشملش كاع الادارات والمؤسسات.
ثم كيفاش تفرض هاد الجواز فالوقت اللي محدد لقهاوي والمطاعم ما يفوتوش لحداش الليل. هادي عبثية ما فوقها عبثية. فرض جواز على المطاعم وووو كيفرض ان هاد الاماكن تبقى فاتحة حتى الثلاثة او الربعة ماشي تسد مع لحداش.
استوزار ايت الطالب خطأ وتسويق قرارات الحكومة عبر هاد الوزير خطأ اكبر. للحكومة رئيس وناطق رسمي. دابا كيف كتشوف احزاب الاغلبية المكونة لها كلشي ساكت. هادا بوحدو راه مشهد عبثي اخر.