[email protected] قبل أيام تكلمات تقارير اخبارية عن عملية شارك فيها "يوروبول" وبوليس الصبليون وفرنسا وبلجيكا بتنسيق مع إدارة مكافحة المخدرات الأمريكية لاعتقال مغربي يعتبر من بين أكثر المهربين المطلوبين عالميا ف برشلونة. اخر التقارير كشفات عن هوية البارون الموقوف، الأمر كيتعلق ب فكري أملاح الملقب ب الريفي واللي عندو تجبدات سمتيو بزاف ديال المرات ف ضوسيات كوكايين الجديدة والداخلة واللي تم خلالها حجز كميات مهمة من الكوكايين النقي كتقدر القيمة ديالو بأزيد من 200 مليار سنتيم. وحسب آخر التقارير، البارون المعتقل هو المورد الرئيسي ديال جميع شبكات الاتجار ف المخدرات ف اسبانيا بحال ريزو ميسي الحشيش وأبرز الشبكات الاجرامية الاسبانية وغير ف هاذ العام قدر يهرب 4.3 طن من الحشيش و 1.8 طن من الكوكايين للتراب الاسباني وعندو شبكة لوجيستكية كبيرة ف المغرب كتكون من عناصر بشرية وأسطول ديال القوارب السريعة.. اعتقال فكري جا بعد ما تمكنو ضباط اليوروبول من اختراق السيرفر اللي كيستخدموه افراد الريزو ديالو ف تشفير المكالمات الهاتفية ولقاو عندو أجهزة اتصالات كينسق بيها عمليات التهريب الدولي للمخدرات ودفتر ملاحظات عامر بتفاصيل عمليات تهريب كيخطط ليها، من بينها تهريب أزيد 7 أطنان من الكوكايين. وقالت التقرير ذاتها، أن البارون الموقوف كان ساكن ف بارطما متواضعة وضبطات الشرطة فيها حوالي مليون يورو (1.13 مليون دولار) كاش و 3 ملايين يورو من المجوهرات و 10 سيارات فاخرة وكوليكسيون ديال الماگات غير وحدة ساوية تقريبا 800 ألف يورو. وتم اعتقال المتهم اللي عندو علاقات مع كارتيلات كولومبية ف مداهمة وسط حي سكني وتم استعمال هيلوكوبتر مزودة بكاميرات حرارية لنقل تفاصيل الاعتقال عبر بث مباشر بمقر الشرطة الاقليمية الكتالونية وتابعه ايضا مسؤولين أمنيين من الدول اللي شاركات ف التحريات حول هاذ الريزو اللي كان كيهرب الحشيش من المغرب والكوكايين من أمريكا اللاتينية لأروبا بطرق ذكية بحال كما موقع ف ميناء برشلونة بعد ضبط شحنة من المخدرات معباة ف كتل ضخمة ديال الاسمنت. ويعتبر الموقوف من أبرز المطلوبين عالميا بسباب تهريب المخدرات والاتجار الدولي فيها واستغلال شركات قانونية لغسل الاموال واستثمارها بشكل شرعي ف مشاريع، كما تم اعتقال 16 شخصا أغلبهم مغاربة بسبب علاقتهم بهاذ البارون اللي واخا لاباس عليه كان عايش حياة التقشف ومانع على أفراد الريزو ديالو يعيشو ف الرفاهية وساكن ف حي عادي ف برشلونة وهاذ الشي هو اللي خلا يوروبول وبوليس بلدان أوروبية يديرو تحريات مدة 4 سنين على شخصية إجرامية ما معروفش عليها بزاف ديال التفاصيل.. https://www.elespanol.com/espana/20211218/caida-fikri-hachis-surtia-toneladas-droga-castanas/635436644_0.html
