فعايل الاستقلاليين.. ضربو الطم على وزيرتهم حيار لي جابت راجلها للديوان وصفقو عليها ودبا رجعو للمعارضة وهجمو على وزيرة السياحة لي قافزة ومعندهاش مع لغة الخشب

الفريق الاستقلالي للوحدة والتعادلية داير رجل فالحكومة ورجل فالمعارضة، بحيث ملي كيتعلق الموضوع ديال الجلسات البرلمانية بوزير ديالهم كيصفقو ليه واخا هادشي ديال التصفاق غريب على مؤسسة تشريعية مهمتها واضحة ف الدستور، وملي كيتعلق الموضوع بوزير اخر كيديرو المعارضة كيف وقع اليوم مع وزيرة السياحة.
مداخلات الفريق الاستقلالي كلها هجوم على فاطمة الزهراء عمور، وزيرة للسياحة والصناعة التقليدية والاقتصاد الاجتماعي والتضامني، طالبين منها تلقى حلول للمقاولات السياحية واخا هوما عارفين بلي هاد الحكومة معندهاش حلول ولا فلوس باش القطاع يرجع ليه الحيوية من غير داك الدعم الاجتماعي ديال 2000 درهم.
التناقض عند الفريق الاستقلالي هو انهم ضربو الطم على فضيحة قد الخلا ديال وزيرتهم فالتضامن والاسرة لي جابت رجلها للديوان وكلفاتو بمهمة. سوبر مستشار وصافي.
بعض البرلمانيين فالمعارضة هضرو على الازمة ف القطاع السياحي خصوصا وأن اموال صندوق كورونا سالات وطالبو ببدائل حقيقية ماشي كثرة الاجتماعات وبلي ناس معندهمش مياكلو والابناك معقلوش عليهم.
الوزيرة عمور كان ذكية فجوابها قالت بصريح العبارة "هاد المشاكل كلها خدامين عليها وكنشوفو مع الابناك". المختصر المفيد قالتو بدون لغة الخشب كيف كيديرو شي وزراء.
صحاب الفنادق ومالين الشكارة فالسياحة من البرلمانيين تدخلو وكيغوتو فحال البرلماني البامي اللبار ديال فاس، سول شنو الإجراءات لي غايديرو مع صحاب السياحة وامتى يفتحو الحدود.
الوزيرة قالت بأن هناك إقبال للمغاربة على السياحة الداخلية لي كتمثل 30 في المائة. وكاين انتعاش فهادشي.
اللبار كاعي وتدخل وقالي بلي الحكومة مدارتش تا شي حاجة باش تشجعو هاد السياحة، مضيفا بلي الابناك وما ادراك ما الابناك هاد اللوبي داير حالة.