خصوم لشگر فقدو الأمل.. تجمع المعارضين للولاية الثالثة طاح فخلافات وقيادي منهم: يلا مشينا للمؤتمر فهاد الظروف غايربحنا لشگر

السرعة القصوى باش غادي توجاد للمؤتمر الوطني لحزب الاتحاد الاشتراكي للقوات الشعبية خلا الحرب بين معارضي الولاية الثالثة والمؤيدين يدخلو فمشاحنات فايسبوكية وتبادل التهم فالايفات.
بعد التعليقات على ندوة نظمتها مؤسسة عبد الرحيم بوعبيد، وجمعات خصوم لشكر، باش يداكرو في مستقبل الاتحاد الاشتراكي، كتبين جانب من هاد الحرب الإعلامية، بحيث استغرب أنصار لشكر كيفاش الأشعري وبنعتيق والشامي لي مخلاو وزارات ومؤسسات عمومية هدرو على النفس الثوري، وبداو يفكرو فأيامات الحبس والمنافي.
استغربو كذلك كيفاش بنعتيق كيهضر على الاعتقالات، بحيث واحد الفيسبوكي خلالو تعليق " اسي عبد الكريم ، خلي عليك المعتقلين فالتيقار، راك كنتي فالحكومة فاش تعتقلو، وكنتي كطير من دولة لأخرى باش تدافع على رواية الدولة بخصوص الاعتقال،..".
مصادر اتحادية قالت ل"گود" "مفهمناش بنعتيق ملي بدأ يدوي على استقلالية القرار الحزبي ،بأيام كان تابع إلياس العماري، فاش شكلو G8"
هاد الندوة واخا بغاو يبانو منسجمين، ولكن لاحو الهضرة لبعضهوم، نجمي قال بلي مكانش خاص تشاركو فترتيبات المؤتمر، حيت شي وحدين غير أرانب سباق.
هنا باين تضارب بين المعارضين ديال لشكر، مكانوش منسجمين.
حسن نجمي فالندوة قال يلا مشينا فهاد الظروف غايطيحنا داك خونا في اشارة لادريس لشكر.
حاليا المعطيات داخل التنظيم الاتحادي تفيد بلي لشكر غادي فطريق الولاية الثالثة وعندو أغلبية المؤتمرين.