هادي رسالة خايبة للرباطيين.. أحزاب عاودات رشحات "بلطجية" مجلس المدينة للانتخابات الجماعية

غريب شي احزاب كتعطي رسائل خايبا للمواطنين وللمؤسسات، فاش عطات تزكيات لمنتخبين مخلاو مادارو في بلوكاج المشاريع التنموية بالعاصمة، بل مارسوا "البلطجة" و"العنف" خلال دورات سابقة بمجلس مدينة الرباط.
باستثناء الانتخابات البرلمانية، حيث الاحزاب دارت وجوه شابة بحال الاحرار والبام٬ باستثناء هاد الشباب، الاحزاب رجعات نفس الاسماء للانتخابات الجماعية، فحالا يلا بغات "تعاقب ساكنة العاصمة" تقول فاعلة جمعوية ل"كود".
بعض سكان اليوسفية استغربو هاد المضاربة بين البام والاحرار على المقاعد الجماعية، بوجوه قديمة، اضافة إلى أن "بعض الممارسات القديمة مغاتساليش الا فحالة واحدة هو أن الساكنة تعاقب هاد الوجوه القديمة".
العاصمة ملي جا الوالي اليعقوبي وهي كتقاد، مشاريع خدات طريقها والمساحات الخضراء كتوسع والطرقان كتقاد، هادشي طبعا تيكون بتعاون بين جميع السلطات المتدخلة وبما فيها مجلس المدينة اللي ترأسو البي جي دي.
حسب بعض الفاعلين فالمدينة واللي تحدثو مع "كود"، فإن عودة نفس الوجوه للترشح عيب وعار على جبين الاحزاب، كيفاش شي وحدين كيضاربو فمجلس المدينة بسبب حسابات سياسية ومصلحية، يعاودو يرشحوهم، هادشي غادي يساهم فالعزوف الانتخابي صافي".
هادو راهم عارفين راسهم، وديما كيديرو العرقلة لدورات المجلس الجماعي وكيديرو تصرفات لا علاقة لها لا بالدستور ولا المؤسسات ولا المنطق، بلطجية وصافي. خصهم يحشمو ويرجعو للور.
طبعا بعض الاحزاب عارفين هاد "المحترفين فالصفقات، واللي كولشي كيديروه بعيد الانظار" لذلك مداورهمش وكلاء اللوائح، اكيد شي وحدين غادي يتصدمو الى لقا راسو ف اخر اللائحة وميقدرش يهضرو حيث ماضيهم خايب".
كاينين شي مرشحين مذكورين في تقارير المجلس الاعلى للحسابات، هادو خلاص خصهم يحشمو على عراضهم.
غانرجعو للموضوع بالتفاصيل وبالاستناد الى تقارير رسمية كتهضر على بعض هاد المنتخبين.