انتخابات حزب الحركة الشعبية قربات.. العنصر وأعضاء المجلس الوطني فضيافة عائلة الكشوطي بالناظور

علمت "كود"، أن الأمين العام لحزب الحركة الشعبية، محند العنصر، غادي يجتامع اليوم السبت فمدينة الناظور، مع أعضاء المكتب السياسي وأعضاء المجلس الوطني، والقيادة ديال السنبلة بالدريوش والناظور.
وقال مصدر خاص، بلي العنصر غايكون فضيافة عائلة النائبة البرلمانية، فاطمة الكشوطي، بنت المستشار الجماعي فبلدية سلوان، وعضو المجلس الإقليمي لناظور، أحمد الكشوطي، فإطار لقاء باش تدار مناقشة الأمور التنظيمية للحزب، لي كيحضر للمؤتمر الوطني المقبل.
وبحسب المعلومات اللي كاتروج، فا الأمين العام محند العنصر، كيحاول من خلال هاد اللقاء، يقنع الأطر ديال الحزب فناظور والدريوش، باش يدعمو المستشار ديالو، فلمؤتمر المقبل، باش يكون القائد الجديد ديال السنبلة.
من جهة أخرى، أشارت واحد المجموعة ديال المتتبعين للشأن السياسي فلمنطقة، إلى أن أحمد الكشوطي، من خلال تنظيمو لهاد اللقاء، كيحاول يتقرب من القيادة الوطنية دلحزب، باش يدير لبنتو بلاصة وتكون لها مكانة فوسط أطر السنبلة.
ومن هادشي كلو، الأمور لحدود الساعة، مزال ما واضحاش، خصوصا أنه كاين ناس أخرى كتشارك فلعمل الحزبي ديال "قلعة" المحجوبي أحرضان، كتقول بأن الاستراتيجية لي كتسير بها القيادة الحالية، مكاتخدمش مستقبل المؤسسة فالمشهد الساسي.