مشاريع خطر علينا زمن الجفاف.. منهم الپروجي ديال إنتاج لافوكا اللي كانت علنات عليه شركة إسرائيلية

العام الفايت كانت صفحة "إسرائيل بالعربية" كشفات على موقع التواصل الاجتماعي "تويتر" أن أكبر شركة للمنتجين والمصدرين لفاكهة "لافوكا" في إسرائيل تستعد لإطلاع مشروع لإنتاج هاد الفاكهة بالمغرب. الپروجي هضرات عليه "كَود" فوقتو.
الصفحة كانت ذكرات فتويت ديالها أن هاد المشروع غادي يكلف حوالي 9 ملايين دولار، ويستطيع المغرب بموجب هذه الشراكة إنتاج 10.000 طن من الأفوكا سنويا.
بحال هاد المشروع مزيان لبلادنا فظروف أخرى لكن فهاد الأزمة ديال الجفاف، اللي بدات علاماتها من اللخر ديال العام الفايت، ماصالحش والضرر ديالو أكثر من فايدتو. خاصنا نعرفو بللي إنتاج غير كيلو واحد من لافوكا كيحتاج مابين 1000 و2000 لتر من الما. يعني إنتاج طن واحد يقدر يحتاج أكثر من مليون لتر ديال الما. بزاف.
بلادنا دبا دخلات فموسم جفاف خايب بسبب تأخر التساقطات المطرية هذه السنة والفرشة المائية ضعيفة والسدود تقريبا وكحو، وهادشي بالضبط اللي دفع الحكومة إلى اتخاذ عدد من الإجراءات الاستثنائية لمواجهة الوضعية الحالية وترشيد استخدام الموارد المائية.
بالتالي هاد المشروع، و اللي بحالو اللي كيستهلكو الما بزاف، كيبقى بلا معنى وبلا فايدة فهاد الظروف الخايبة ديال الجفاف اللي كتاني منو البلاد.