"كود" هدرات مع مسؤولين كبار دوزو الديبلوماسية فيهم وزراء خارجية وكتاب دولة وديبلوماسيين دوزو مدريد. تفاجئنا وبزاف وخاصنا نبقاو حاضيين بزاف نوضو نخدمو وبرافو سيدنا

من نهار نشر الديوان الملكي الرسالة اللي بعثها رئيس الحكومة الصبليوني بيدرو سانشيث الجمعة 18 مارس 2022 وفيها باللي خاص احترام للسيادة ديال المغرب واسبانيا وتشديد على ان الحكم الذاتي اللي قدمو المغرب ف2007 هو "الاساس الاكثر جدية وواقعية ومصداقية" باش تتحل قضية الصحرا٬ وحنا ف"كود" كنجمعو اراء فئة كتعرف هاد الملف مزيان.
"كود" سولات 6 المسؤولين كبار فالديبلوماسية المغربية. كانو وزراء خارجية وكتاب دولة فالخارجية وديبلوماسيين خدمو فمدريد وعارفين خبايا العلاقات المغربية الاسبانية.
طبعا كلهم قبلو يهدرو مع "كود" بشرط ان اسمهم ما يتدكرش. واخا كلامهم كلو اشادة بالخدمة اللي دارها المغرب وخاصة رئيس الدولة محمد السادس٬ ولكن فضلو انو فنصر كبير بزاف للديبلوماسية المغربية من الافضل انو يبقى نصر لكل لمغاربة بقيادة الملك وباش تتجنب اية قراءة من اي مسؤول. كلامهم كان انعكاس لوطنيتهم. فرحة بنصر كبير حققاتو الديبلوماسية.
"كود" سولاتهم نفس السؤال؟ باش شفتو الرسالة ديال سانشيث لسيدنا باش حسيتو؟ كنهدرو على اول شعور ماشي على التحليل والقراءة اللي قدموها.
كل الديبلوماسيين تقريبا اللي هدرات معاهم "كود" رددو كلمة "تفاجئنا". فاجئاتهم الرسالة والموقف ديال حكومة الاشتراكيين. تفاجئو وهما فرحانين. غير ما كانوش كيتسناو موقف بحال هادا فهاد الفترة بالضبط من هاد المسؤول الحكومي الاسباني.
ديبلوماسي فسر ل"كود" علاش تفاجأ "رئيس حكومة ما بداش ولايتو بزيارة المغرب كيف كان فالسابق مع رؤساء الحكومة. تلاقى هادي ايام مع ديال البوليساريو فبروكسيل فالقمة الاوربية الافريقية٬ وزاد ديبلوماسي اخر ل"كود" "كلشي شفنا كيفاش سانشيث مشى كيقلب علي بايدن وتلاقاه لمدة 25 ثانية فالطريق باش يهدر ليه على قضية الصحرا والاعتراف الامريكي بمغربيتها"٬ فيما اضاف ديبلوماسي ثالث ل"كود" "راه ما عمر رئيس الحكومة الاسبانية خدا موقف واضح فهاد القضية. بل هو اللي دخل ابراهيم غالي لاسبانيا وعليها ناضت ازمة غير مسبوقة مع المغرب". التركيز على الحذر مزيان. الاشتراكيون ديما كانو مع الانفصال ماشي غير فالصبليون حتى فاوربا يوضح المصدر ل"كود".
هاد الشي زائد طبيعة التحالف اللي كيقودو سانشيث مع "اليسار الراديكالي" بوديموس وبدعم احزاب قومية كلهم داعمة للانفصال٬ يشرح ديبلوماسي رابع ل"كود"٬ كل هاد الشي خلات هاد الديبلوماسيين يبان ليهم هاد القرار الاخير "مفاجئة" ولكن زوينة وسارة وبزاف لخصها الديبوماسي الرابع فعبارة "ما تسنيتهاش".
كاع الديبوماسيين اللي هدرو معانا كررو كلمة اخرى "كنا كتنسناو من الجارة الشمالية هاد الوضوح" باش نعيشو هاد الفرحة كيف وصفها ديبلوماسي خامس ل"كود". هاد الديبوماسي اضاف ل"كود" باللي "كلشي جا نتيجة صمود الملك".
وذكر سادسهم ل"كود" باللي هاد الموقف راه ماشي جديد. سبق لرئيس الحكومة الاسبق الاشتراكي ثاباتيرو ان عبر عليه. اليوم فالصباح ذكر وزير خارجية الصبليون الاسبق والديبلوماسي المشهور موراتينوس باللي سبق التعبير على هاد الكلام اللي ذكرو سانشيث قبل وما جاب حتى شي جديد.
طبعا كلهم ذكرو فكلامهم مع "كود" باعتراف امريكا بمغربية الصحراء وقرار المانيا الاخير اللي بسبابو رجع المغرب سفيرتو فبرلين وموقف فرنسا السابق من هاد القضية. دوليا هاد الشي سهل على الصبليون هاد القرار
هاد الديبلوماسييبن اكدو ل"كود" باللي المغرب خاصو يبقى راد البال بزاف بزاف وباللي الوقت اليوم الخدمة والخدمة والخدمة.
كما كشفو ل"كود" ان قرار بحال هادا ما كيجيش بين ليلة ونهار. راه قرار الدولة بكاع مؤسساتها وتم التفكير فيه مزيان مزيان وكاع اجهزة الدولة الاسبانية من الجيش والمخابرات والامن.... كان عندهم دور فيه.