الرباط بدات ترد اخيرا على الصبليون. رد ضعيف ما يقنعش حتى لمغاربة ونسى شوهتنا: علاش نرسلو اطفالنا

مزيان الرباط بعد ما سكتات هاد ليام بدا ترد. اختارت وكالة المغرب العربي باش دير ردودها. وكالة الانباء الرسمية وطبيعي كتصرف الموقف الرسمي للدولة المغربية.
وزير الخارجية والتعاون المعروف بجبنو بعد وخلى الوكالة ترد. كما فازمة القدس٬ اختار هاد الوزير اللي غير كينقز٬ يضرب الطم. الجبن سمة ديما ملازماه. باش تاصلات بيه "كود" قال كنهدر الوقت الي بغيت. شوفو وقاحة واحد ما عندو حتى شي شرعية ياخد الخارجية فين كتوصل. لا هو حزبي يحاسبو غدا البرلمان على اخطاؤو ولا غير ذلك.
من البارح بدات لاماب كتجاوب. كاين مقال باللي "اسبانيا عزلات نفسها عن محيطها الطبيعي" كيقصدو المغرب. فيه باللي المشكلة كلها هي نهار استقبلات حكومة بيدرو سانشيز زعيم البوليساريو ابراهيم غالي "مفضلة حماية مصالح غامضة مع "البوليساريو" وسيدها الجزائري"
قال الكاتب الصحافي موقع المقال امرابط ان المغرب ابان على الدوام "عن التزام راسخ لصالح تعزيز التعاون متعدد المجالات، بما في ذلك المجالات الحساسة من قبيل محاربة الإرهاب، والجريمة المنظمة والهجرة غير الشرعية".
واعتابر ان "استضافة مجرم حرب متهم بارتكاب أعمال إرهابية وإبادة جماعية، بما في ذلك العديد من الضحايا الإسبان والمغاربة الذين لا يتوقفون عن التعبير بأعلى صوتهم عن معاناتهم، حطم هذه الثقة وقوض العلاقات الإستراتيجية مع المغرب، الحليف الوازن".
دابا اللي ما كاينش فهاد المقال هو دخول اكثر من 2000 قاصر من ولادنا من اطفالنا من اصل اكثر من 8 الاف لسبتة المحتلة. الصور ضرات صورة بدات كيتحرك.
التوظيف ديال هاد الصور ضر بلادنا بزاف. خلى الاتحاد الاوربي كولو يكون ورا اسبانيا. غادي يزيد يعزلنا ايلى ما تصرفناش بحكمة عوض التهور.
هاد التبريرات فهاد المقال كان يكون عندهم معنى كون ما شفناش دوك الصور اللي غادية تبقى محفورة فذاكرة كاع لمغاربة وطبعا العالم. المغربي حس بالاهانة من هاد التصرف. حس بالاحتقار لذاتو باش شافهم. هذا هو الموضوع المهم دابا.
موضوع غالي ولى ثانوي. خاصنا ردود قوية. هاد الرد حتى لمغاربة ما كيقنعهمش كيفاش يقنع الاخر ويقنع عدالة قضيتنا. كان يكون تصرف اخر والمغرب يخرج مرفوع الراس. لكن اللي خدا هاد القرار خسر صورتنا