جديد عودة العلاقات بين المغرب واسبانيا: ديوانة لاول مرة فباب سبتة واتفاق على ترسيم الحدود البحرية حدا كناريا والصبليون شادين فدرابو بلادهم المقلوب فالفطور

البيان المشترك المغربي الصبليوني بعد زيارة رئيس الحكومة الاسبانية بيدرو سانشيث للمغرب ولقاؤو بالملك محمد السادس بالقصر الملكي بالعاصمة الرباط٬ ما جبدتش سبتة ولا مليلية.
سانشيث قال فندوة صحافية بعد افطار عرض عليه سيدنا باللي سبتة ومليلية اسبانيتين وما فيهم نقاش، لكن الصبليون ما فهموش علاش ما تجبدوش اصلا فالبيان المشترك.
الجديد اللي قالو رئيس الحكومة وما عمرها كانت هي نقطة ديال الديوانة فباب سبتة. معروف انو من 2018 وكلشي مسدود بين المغرب وبين سبتة ومليلية. قبل كانت نقطة فيها الديوانة فمليلية اما سبتة فهادي جديدة.
من الامور اللي جديدة وذكرها هاد المرة البيان المشترك هي النقطة 6 فتفعيل خارطة طريق العلاقات الجديدة بين الدولتين. فيها "سيتم تفعيل مجموعة العمل الخاصة بتحديد المجال البحري على الواجهة الأطلسية، بهدف تحقيق تقدم ملموس". هاد الشي كيعني انو غادي يتم ترسيم الحدود البحرية المغربية الاسبانية =مع جزر الكاناري=
المغرب كان دار هاد الترسيم وتقلقات مدريد. دابا غادي يتعاود كلشي.
الصبليون كاعيين وما لقاوش ما يشدو فرئيس حكومتهم اللي بات البارح فدار الضيافة وصبح اليوم فبرشلونة٬ هو الدرابو ديال بلادهم اللي كان مقلوب ففطور البارح فالقصر الملكي. الدرابو اللي ورا سانشيز.
واخا نشاط ماشي رسمي وغير تكبيرة ما عمر شي رئيس حكومة صبليوني حضى بيها من طرف القصر الملكي٬ ناضو شي وحدين كيديرو تأويل لهاد الحدث.
اصلا فالفطور ما عمر القصر الملكي فعراضاتو على ضيوفو من الخارج كبر بيهم ودار ليهم علم بلادهم. هادي تكبيرة ودابا دخلو فالتأويلات باللي هادي رسالة من المخزن وباللي خطأ بروطوكولي ما كانش يكون ....
المهم المخزن واعر. شاد طريقو وما مسوقش لهاد التخربيق. الاساسي فهاد الشي هولو هي النقطة الاولى فهاد خارطة الطريق الجديدة "تعترف إسبانيا بأهمية قضية الصحراء بالنسبة للمغرب، وبالجهود الجادة وذات المصداقية للمغرب في إطار الأمم المتحدة لإيجاد حل متوافق بشأنه. وفي هذا الإطار، تعتبر إسبانيا المبادرة المغربية للحكم الذاتي التي قدمها المغرب سنة 2007 هي الأساس الأكثر جدية وواقعية وصدقية لحل هذا النزاع"