شكون باغي يشعلها فكازا بين الراجا والوداد وعلاش النيابة العامة مازال ما دخلاتش. لافتة جديدة تعلقات فملعب بنجلون مستفزة لجمهور الحمرا وجبدات لقجع

البارح الوداد خسرات مع الرجا بجوج لزيرو. خسارة خلات الخضرا بقات ليها غير نقطة باش توصل للوداد وشعلات الحماس فالدورات الخمس الاخيرة من البطولة. مدرب الوداد وليد الركراكي بارك للخضرا هاد الرباح وعتارف باللي فرقتو تستحق الهزيمة. حتى لهنا كنهدرو علي الكورة وعلى الروح الرياضية بقبول الهزيمة.
لكن وقعات احداث غادية تخرج الماتش من مجالو الكروي لحرب بين الالتراس. بين جمهوري الوداد والرجاء. شفنا مؤخرا احداث خطيرة. كان من المفروض تهدن النفوس ماشي يصبو شي وحدين الزيت علي العافية.
دابا العافية غادية وتكبر. الخطأ الاول دارتو ادارة الرجاء الجديدة. كنهدرو على الرئاسة ماشي الادارة الفنية. فالصفحة الرسمية للرجاء ماشي صفحة المشجعين والالتراس٬ تنشرات صورة مهينة للوداد. تصرف ثمنو غادي يكون غالي. استفزاز غادي ينوضها. يمكن هادا هو الهدف ديالو. نعاودو نقولوها. كون دارتها صفحة للالتراس مفهومة. الشدان القاصح ولخفيف ميدانهم وخدمتهم. النادي كنادي خاصو يرفض هاد التصرفات.
اليوم خرجات صورة اكثر استفزاز. قدام ملعب الوداد كانت لافتة كبيرة سمات الوداد ب"وداد ام كلثوم" وجبدات لقجع ولحوا فاشارة الى الخسارة مع الرجا.
هاد الشي ممكن يوقف ايلى تفتح تحقيق. كاينين كاميرات قدام ملعب الوداد كيفما كاينين كاميرات قدام ملعب الرجاء. خاص اللي دار هاد الشي يخلص هاد الفعلة ديالو اللي حتى واحد فكازا ما يقدر يتوقع اش يقدر يوقع فكازا.
شفتو جمهور الوداد وكتعرفوه. شفتو جمهور الرجا وكتعرفوه. ايلى ناضت بيناتهم ما يمكن حتى حد يوقفها. غادية تشعل كازا كلها. هادي فتنة كبيرة وراها دابا كتشعل.
دابا الكورة فملعب النيابة العامة. تتحرك قبل ما يفوت الفوت