الاجابة الاهانة لوزير خارجيتنا لدولتنا اللي كتعرض لتشويهة عالمية. واش المغرب ملكك باش تجاوب وقت ما بغيتي

وزير الخارجية والتعاون ناصر بوريطة ما كيهموش بلادو ولا صورتها فالعالم. مركز على جلابتو ولبسو. باش سولاتو "كود" على اللي واقع فسبتة٬رد بغباء فيه استعلاء متخلف "ما غاديش نجاوب" وباش عاودات قالت ليه "كود" وعلاش" زاد فغباؤو وقال "حنا كنهدرو ماشي كنردو على الاسئلة" وزاد فتصريحو ل"كود": "ايلى عيط علي دابا صبليوني. نجاوبو. ايلى عيط علي فرانساوي نجاوبو. انا كنبغي نهدر مللي نبغي".
تصورو وزير خارجية بلاد. مسؤول على صورتها على ديبلوماسيتها يتكلم بهاد الطريقة. يجاوب بهاد المستوى المنحط. يرد على صحافي سولو بهاد العبارات فالوقت اللي بلادنا كتعرض لاكبر عملية تدمير لصورتها على خلفية احداث سبتة المحتلة. دولة كتخلى على ماشي القاصرين اللا على اطفالها. على عيالاتها. صور كتخلي المغربي فكازا فالرباط فطنجة فتطوان فالعالم يسب بالاهانة. يحتاقر ذاتو. يعرق غير بوحدو.
وسط هادالشي كولو يخرج هاد بوريطة يدير هاد التصريح. قمة الاستفزاز لمشاعر لمغاربة. لناس بلادو. فنفس الوقت اللي وقع هاد الشي كان كيدير لقاءات مع دول حتى مغربي ما عارفهم فين كاينين. اسمها مملكة اسواتيني. كان كيضحك ومقاد الحالة بحال ايلى ما واقع والو فبلادو. بحال ايلى المغرب ما كيتعرضش لاكبر حملة تزيد تكفس الصورة ديالو بعد ما تكفسات بهادوك الصور.
بوريطة كان مدور بيه مستشارين ومستشارات همهم الاول طريقة لبسو. همهم ما يقلقوش هاد الوزير المستفز بغباؤو.
خاصو يعرف باللي باش كتكون فشي بلاصة غادي تخلص الفاكتورة. انت بالضبط غادي تخلصها غالي. غادي يدار ليك لحساب على لعبك مع اجهزة مغربية حساسة. على تحليلك الذاتي لملفات دقيقة للقصر. على الهروب من المسؤولية.
المغرب غادي يتصالح مع اسبانيا ولكن بعد ما يتخلص من امثالك. حقاش ديما مقدم حساباتك الشخصية. ديما كتبغي تكون انت اللي مضوي لبلاد.
المغرب يستحق وزير خارجية او وزيرة خارجية بحجم تاريخو بحجم فخر لمغاربة ببلادهم. طبعا هاد الشي ما كيتوفرش فبوريطة