تفاصيل حصرية على فضيحة رئيس غرفة بمحكمة الاستئناف فبني ملال اللي حصل بالرشوة.. القاضي كان استافد من تمديد حد سن التقاعد لأول مرة ودبا مزال فحالة سراح وغادي يتحال على الداكي مباشرة

علمت "كَود" أن القاضي اللي حصل متلبس بالرشوة مع السمسار ديالو نائب رئيس جماعة الفقيه بن صالح كان استافد من تمديد حد سن التقاعد للمرة الأولى لمدة سنة واحدة برسم سنة 2022.
وكان المجلس الأعلى للسلطة القضائية قد أفرج شهر يناير الماضي عن لائحة تمديد وتجديد وتمديد حد سن تقاعد القضاة بتاريخ، والتي استفاد منها 359 قاضيا يمارسون مهامهم بعدد من الدوائر القضائية على المستوى الوطني.
ووفق ما أكدته مصادر "كَود"، فإن هاد القاضي تدارت ليه مسطرة خاصة ويتابع فحالة سراح، حقاش يتمتع بالامتياز القضائي، مشيرة إلى أن الوكيل العام للملك لدى محكمة الاستئناف ببني ملال استمع إليه، في انتظار إحالته على الوكيل العام للملك لدى محكمة النقض.
يشار إلى أن الفرقة الوطنية للشرطة القضائية كانت حصلات هاد القاضي ونائب رئيس جماعة الفقيه بنصالح متلبسين بتلقي رشوة قيمتها وصلات ل15 مليون سنتيم مقابل تدخل هاد المسؤول القضائي فشي ملف كان معروض عليه وكان مدرج في التأمل قبل مايقرر يخرجو فظروف غامضة ويدرجو في جلسة أخرى.
هاد القضية فجراتها واحد السيدة اللي ودلها كان مشدود وتحكم ابتدائيا، وبعدها طلب منها سمسار واللي هو نائب رئيس الجماعة المذكورة مبلغ مالي كبير مقابل يحل ليها لحريرة ديال ولدها مع القاضي اللي شاد الملف.
المهم هاد السيدة عيطات للرقم المباشر اللي دايرها رئاسة النيابة العامة للتبليغ عن جرائم الفساد والرشوة، ورئيس النيابة الحسن الداكي تبع هاد الموضوع بنفسو بتنسيق مع الوكيل العام ديال بني ملال. تفجير هاد الملف استغرق شي سيمانة ومن بعدها تفضح كلشي.
مصادر "كَود" أوضحت بللي الوكيل العام للملك لدى محكمة الاستئناف ببني ملال سمع لهاد المسؤول القضائي غير فإطار التفتيش وصافي، لكن اللي غادي يتقدم عندو مباشرة ويسمع ليه هو رئيس النيابة العامة باعتباره وكيلا عاما للملك لدى محكمة النقض، مع الإشارة أن هاد القاضي موجود دبا فحالة سراح وماشي فحالة اعتقال.