"جون أفريك": واشنطن كونفيرمات ان المغرب غادي يفتح قريبا سفارة ليه فإسرائيل

مجلة " jeune afrique جون افريك" قالت ان المغرب قريب يفتح سفارة فإسرائيل.
واكدات المجلة ان وزير الشؤون الخارجية الإسرائيلي يائير لابيد قال فندوة صحافية ف15 يونيو : ان وزير الخارجية المغربية ناصر بوريطة جاي لإسرائيل هاد الصيف، وغادي يتم فتح جوج سفارات فاسرائيل والمغرب فهاد الشهورا الجاية، ولكن ماحددش واش غادي تفتح سفارة المغرب فالقدش ولا تل ابيب.
السلطات المغربية ماكذباتش هادشي، ولكن فنفس الوقت ما كونفيرماتوش.
ولكن حسب مصادر "جون افريك"، المغرب فعلا قريب يفتح سفارتو فاسرائيل. وهادشي اللي اكداتو الديبلوماسية الامريكية عبر الناطق الرسمي باسم سفارة مريكان فالرباط جيروم شيرمان، اللي قال ان الحليفين ديال الولايات المتحدة قراب باش يحولو مكاتب الاتصال ديالهم لسفارات كاملة مكمولة.
واضاف الديبلوماسي نفسو: تقوية العلاقات بين المغرب واسرائيل غادي يخلق فرص جديدة باش السلام والازدهار ينتاشرو فالمنطقة.
وكان المغرب افتتح مكتب اتصال فتل ابيب ففبراير 2021 من بعد اعتراف الرئيس السابق دونالد ترامب بالسيادة المغربية على الصحراء فدجنبر 2020.
وافتتحت إسرائيل مكتبها فالعاصمة الرباط فغشت 2021.
https://www.jeuneafrique.com/1357224/politique/maroc-washington-confirme-louverture-prochaine-dune-ambassade-du-royaume-en-israel/