كشفات دراسة جديدة أن الموض سيلونسيو (Le mode silencieux) اللي فالتلفون ماكيعاونش باش الواحد يحارب الإدمان على التلفون أو ينقص منو ولكن كيأدي لنتيجة عكسية. الباحثين اللي دارو هاد الدراسة من بنسلفانيا فميريكان، خدمو على عينة من حوالي 138 شخص وحاولو يراقبو ليسمارتفون ديالهم، منهم اللي مخلي الصوت ومنهم اللي داير الڤيبرور وكاين اللي قاطع كلشي ومخلي تلفونو فالموض "Mute". موالين الدراسة قالو أن الواحد إيلا قطع الصوت ديال لينوتيفيكاسيون كيتسبب لراسو ف"آلام نفسية" منها بزاف ديال الستريس، بحيث أنه تبين بالنسبة لغالبية الناس اللي كيخدمو بالسيلونسيو كيبقاو يقلبو تلفوناتهم بزاف مقارنة مع إيلا كانو دايرين الصوت. بحالا كيبقاو موسوسين بللي راه شي "حاجة/ميساج/فيديو جديدة" غتفوتهم وهوما مارادينش ليها البال حيث محيدين الصوت للنوتيفيكاسيون. وأضاف فريق الدراسة أن إسكات النوتيفيكاسيون عند الناس اللي كيعانيو من "الخوف من الضياع" وبعض المشاكل الأخرى كيتضرر وضعهم النفسي أكثر.