غير سالات رئيسة مجلس النواب الميريكاني زيارتها لتايوان.. الشينوا بدات مناورات عسكرية كبيرة فسواحل الجزيرة

بدات اليوم الخميس أكبر مناورات عسكرية شينوية فمياه السواحل اللي ضايرة بجزيرة تايوان، بعدما سالات نانسي بيلوسي، رئيسة مجلس النواب الأمريكي، زيارتها لتايوان.
وبدات التدريبات فالساعة 12:00 بالتوقيت المحلي (04:00 بتوقيت كَرينتش) ومن المقرر أنها تتواصل لمدة 5 أيام وغادي تدار فمناطق على بعد 12 ميل من الجزيرة.
وقالت الرئيسة التايوانية، تساي إنكَ ون، بللي بلادها واجهات "تهديدات عسكرية متصاعدة بشكل متعمد".
ورجعات بيلوسي من تايوان نهار الأربعاء، من بعد زيارة قصيرة للجزيرة نوضات صداع بين الشينوا وميريكان.
وقالو عدد من المراقبين بأن هاد المناورات، اللي هي أكبر تدريبات عسكرية شينوية كتدار حدا تايوان، هي رد واضح من بكين على زيارة المسؤولة الميريكانية للجزيرة اللي كتعتابرها الشينوا طرف منها.
وقالت السلطات فتايوان بللي الشينوا صيفطو 27 طيارة هجومية لمنطقة دفاعها الجوي وإن 22 منها دازت من خط الوسط الفاصل بين الجزيرة اللي عندها حكم ذاتي والصين، فالوقت اللي الوضعية فالمنطقة مزيرة وخايبة.