كانت مخاصمة معاه فحياتو.. فنانين فمصر هاجمو المغنية بوسي بعد وفاة باها

من بعد ما شبعات فيه معيور فعدد من البرامج والحوارات التلفزيونية، علنات الممثلة والمغنية المصرية بوسي الموت ديال باباها اللي كانت مخاصمة معاه ومقاطعاه فحياتو.
بوسي قالت أن الوالد ديالها مات بلا ما تكثر التفاصيل، وهادشي خلا بزاف ديال الفنانين يعاتبوها على الطريقة الخايبة اللي كانت كتعامل بيها باها واللي قالت أنها مبرية منو، وأنه كيبغيها على ود الفلوس فقط.
وقالت وسائل إعلامية مصرية بللي محمد شعبان، الواليد ديال المغنية الشعبية بوسي، مات فدارو فمنطقة "الزقازيق 5′′، وفعمرو 85 عام، من بعد صراع طويل مع المرض.
المغني الشعبي المصري "سعد الصغير" من بين الفنانين اللي هاجمو بوسي، وقال ليها "ها هو باك اللي كنتي شبعانة فيه سبان فالبرامج مات".
وفالمقابل قالو بعض المتتبعين فالسوشل ميديا عندهم بللي هاد "سعد الصغير" ماشي شغلو أصلا يدخل بين البنت وباباها بهاد الوقاحة وداير فيها "حارس الأخلاق والصواب"، فحين أنه فقط كيقلب على أي فرصة ومناسبة باش يهاجم بوسي، حيت خدمو شي وقت مع نفس الأشخاص وفضومين واحد (كاباريات وسهرات وحفلات خاصة...) ولكن هي فاتو وولات مغنية مشهورة عليه، بالتالي هو كيحاول يستاغل هاد الحدث الحزين عند عائلة بوسي باش يحرجها حيت كانت عندها مشاكل مع باها فحياتو.
بوسي كانت صرحات أن باباها ما كانش كيعرفها فالصغر، وماشي هو اللي رباهم وما صرفش عليهم، ومللي كبرات وتشهرات عاد بدا كيحاول يتعرف عليها ويتقرب منها غير طمع وعلى ود الفلوس وصافي.