فأول مهمة ليه.. الرئيس الجديد لإتحاد الكرة فالجزائر كيقدم الطاعة للكابرانات بالدفاع على البوليساريو فالكاف

تأكد من جديد أن النظام الجزائري عندو حقد وحسد كبير تجاه المغرب فجميع المجالات، وهادشي ظهر من جديد فالموقف الجزائري من رفض الاتحاد الإفريقي الاعتراف بالبوليساريو لي صبح منبود من طرف الأفارقة، فالوقت لي جايا الجزائر باغيا تنصبو عضو بالسيف فالكاف.
رئيس الاتحاد الجزائري لكرة القدم الجديد جهيد زفيزف فالوقت لي كان خاصو يهتم فيه بالحديث خلال الجمعية العمومية ديال الإتحاد الإفريقي بتانزانيا، على الوضع ديال كرة القدم فبلادو وكيفاش الجزائر فالفترة ديالو غتساهم فتطور كرة القدم الإفريقية، قرر يتحدث فالكلمة ديالو على البوليساريو وينصب نفسو مدافع على هاذ الكيان الوهمي لي رفض الكاف يمنحو عضوية، ببساطة لأنه مفروض دوليا، وبالمقابل العسكر الجزائري لي مدرك باتحاد كرة القدم ديال بلادو باغي يخشيه صحة مع دول كرة القدم فالقارة السمراء.
وفأول مؤتمر كيشارك في جهيد زفيزف لي تعين مؤخرا رئيسا للاتحاد الجزائري لكرة القدم قرر يقدم صكوك الطاعة والولاء للعسكر الجزائري لي كان وراء التعيين ديالو فالمنصب الجديد، وحسب وسائل إعلام جزائرية عبر زفيزف عن الاعتراض ديالو على التعديلات لي عرفها النظام الأساسي ديال الإتحاد الإفريقي لكرة القدم، ولي كانت خلال الجمعية العمومية 43.
وحاول زفيزف البيدق الجديد ديال جنرالات الجزائر فكرة القدم، يؤكد الجدارة ديالو بالثقة لي داروها فيه الكابرانات فأول مهمة خارجية له كرئيس ديال إتحاد الكرة فبلادو، وأكد على المعارضة ديالو للفصل 4 من النظام الأساسي ديال الإتحاد الإفريقي لكرة القدم، لي تصادق عليها خلال الجمعية العمومية فشهر مارس الماضي، ولي كتنص على عدم منح العضوية داخل "الكاف" للدول غير معترف بها ولي معندهاش عضوية داخل الأمم المتحدة.