الصحافيين فخطر بسبب البدراوي اللي هددهم بالحروبات ودعوات للنيابة العامة بالتدخل

عاد المثير للجدل عزيز البدراوي لخلق "البوز"، وشحن الجماهير ضد الجسم الإعلامي الوطني من خلال السب وتهديد الصحافة والصحافيين المشتغلين بالقطاع ونعتهم بأبشع الألفاظ والتحريض ضدهم وتهديد السلامة البدينة ديالهم.
عزيز البدراوي اللي منذ الإعلان على الترشح ديالو لرئاسة الرجاء الرياضي وهو كيحاول يستفز الإعلام الوطني ويحتكر النادي ويفتح الابواب ديالو فقط قدام الطبالة والغياطة من صحاب ليباج فمواقع التواصل الاجتماعي، حط راسو فموقف خايب ملي ناض كيحرض الجمهور على الإعلام المغربي وبالعلالي ورفع شعار "الحرب" فالوقت اللي خاص يكون هو أول الداعين للروح الرياضية بصفتو رئيس واحد من الأندية الوطنية والإفريقية الكبيرة اللي كيتضرب به المثل.
وتهجم عزيز البدراوي رئيس الرجاء الرياضي فتدوينة نشرها على انستغرام على واحد الراديو وعلى واحد من الزملاء الإعلاميين المشتغلين فيه، وتلفظ فحقو بواحد لكلام ما كيليقش يصدر من مسؤول بقيمة رئيس نادي فحال الرجاء، والخطير فهادشي هو أن المسؤول الرجاوي وللي هو أيضا عضو فالعصبة الوطنية لكرة القدم الإحترافية تجاوز الإساءة اللفظية، ولكن تطور للتهديد ديال الصحافيين والاعلاميين الوطنيين بشن الحرب عليهم الأمر اللي كيهدد السلامة الجسدية والبدنية ديالهم وكيوضعهم تحت خطر التهديدات.
التصرف ديال عزيز البدراوي خلف إدانة كبيرة من الجسم الإعلامي المغربي، بحيث خرجو الصحافيين للتعبير عن الإدانة بمثل هاذ لتصرفات والتضامن ديالهم مع الراديو والصحافيين اللي فيه، وأكدوا أنهم يد واحدة ضد أي شخص تجرأ أو تطاول على المس بالإعلام الوطني، وقرروا يكبرو القضية حيث ما يمكنش مثل هذه الأمور تمر مرور الكرام وكأن الصحافي صبح حيط قصير، ودعاو كل من المجلس الوطني للصحافة بالتدخل دفاعا عن القطاع وسلامة الصحافيين وطالبو النيابة العامة بفتح تحقيق فالواقعة لأن القضية فيها تهديد للسلامة البدينة للصحافيين خصوصا وأن عزيز البدراوي استعمل كلمة "الحروبات" فالخطاب ديالو التحريضي، وهو الآن عندو متابعين كثر لكونه يترأس فريق بقاعدة كبيرة من الجمهور وبالتالي فكيتخالف مستوى الوعي والتأثر بينهم، أما الجامعة الملكية المغربية لكرة القدم فهي مطالبة باتخاذ إجراءات وعقوبات صارمة فحق البدراوي لأنه تطاول على حرمة قطاع وطني فاعل فالحقل الرياضي والكروي المغربي وهددو وحاول يصغر من القيمة ديالو.