مع الدخول السياسي.. بوريطة بان على فشلو وخسر كينيا وسفيرو الجديد فنيروبي كيتفرج وخلاو رسالة سيدنا لروتو بلا تنفيذ ولا خدمة دبلوماسية

يوم 14 شتنبر 2022 نشرت وزارة الخارجية بلاغ رسمي على موقعها الإلكتروني (الصورة)، جاء فيه "على إثر الرسالة التي وجهها الملك محمد السادس إلى الرئيس الجديد لجمهورية كينيا، وليام روتو، قررت جمهورية كينيا العدول عن اعترافها ب"الجمهورية الصحراوية" المزعومة والشروع في خطوات إغلاق تمثيليتها في نيروبي".
مدازت حتى مدة صغيرة على تويت دارو الرئيس الكيني الجديد وليام روتو، وفيه اعتراف بمغربية الصحراء، ومسحها، بل أكثر من ذلك تراجع على كلامو وداكشي لي جا فبلاغ وزارة الخارجية بخصوص اعترافو بمغربية الصحراء.
لبارح، جدد الرئيس الكيني وليام سامويل روتو وقوف بلاده إلى جانب البوليساريو ودعمها، خلال استقباله لما يسمى بسفير البوليساريو بنيروبي.
فهادشي كامل بان بوريطة بلي وزير فشل يحافظ على هاد مكتسب الرسالة الملكية، وخلا الساحة فارغة، وحتا السفير الجديد مكيدير تا مجهود، عكس السفير السابق لي كان ديما فالصفحات الرئيسية ديال الاعلام الكيني ودار مقابلات واخترق اللوبيات فكينيا ودار صداقات مع مسؤولين كبار فكينيا.
داكشي لي بناه السفير السابق فكينيا، ردموه صحاب بوريطة، لي مكيقدروش يدير تا مجهود اضافي .
بوريطة معروف عليه كيحيد سفراء خدامين باش يحط بلاصتهم سفراء يكونو تابعين ليه ومتحكم فيهم، ماشي سفير قافز عندو شبكة علاقات وقوي بتأثيرو وثقافتو وحضورو.