فضايح السينمائيين كبرات وفاتو الاسلاميين فتفكيرهم. التازي المخرج والمنتج ومول "غرفة منتجي الافلام": "زنقة كونطاكت" عدو الوطن لا يمثل السينما المغربية وحصر بلادنا فالقحاب والقواويد ولحشايشية

فضايح هادي مع غرف مهنية دالسينما. كلهم طار ليهم لفريخ. كلهم مع التضييق على الحريات. ضد الانتصار ليها. مع المنع. مع الرقابة. كلهم كيصفيو حساباتهم مع مخرج دار اول فيلم ليه اللي هو اسماعيل العراقي صاحب "الزنقة كونطاكت".
دابا بعد الغرفة الاولى لمنتجي الافلام٬ جا بيان الغرفة الوطنية لمنتجي الأفلام اللي كيرأسها مخرج اسمو عبد الرحمان التازي. بلى ما نهدرو على ابداعو. نشوفو اش قال.
قال ليك يا سيدي ان لجنة تحكيم الدورة 22 من مهرجان الفيلم الوطني افتقدات للمصداقية "وخصوصا حالة الفيلم الذي منحته الجائزة الكبرى".
لفضيحة هما غاديين يعتارفو بيها بلسانهم. قاليك يا سيدي باللي المركز السينمائي المغربي طلب من الغرف المهنية تمثيلية فهاد اللجنة. تصورو هاد الخطأ لكبير اللي دارو هاد المركز. كيفاش كل غرفة تجيب عضو لتشكيل اعضاء لجنة التحكيم. راه الحماق هادا.
كلشي بدا مغشوش. ومع ذلك هاد الغرفة قالت باللي هاد الشي "تدشين حكامة جيدة في تدبير شؤون هذه المؤسسة التي فقدت سلطتها ومصداقيتها لأكثر من سبع سنوات اختار خلالها المدير السابق تدبيرا أحادي الجانب ، مهمشا المهنيين ومنظماتهم". شوفو فين ولينا.
وزاد باللي رفضو اقتراح اسم بلا ما يذكرو اسمو وكيقصدو الصحافي بلال مرميد٬ ومن بعد قالو باللي أثر على اعضاء لجنة التحكيم باش بقى فهاد اللجنة.
واعتابرو تتويج "زنقة كونطانت" "تتويج للعار" حقاش جيل التازي وصحابو ما ربحو والو. واتهم مرميد بلا ما يقول اسمو طبعا ب"تشويه سمعة الرواد والقدامى والمناضلين المحترمين الذين بنوا هذه السينما الوطنية على مدى سنوات 60/70 من القرن الماضي".
هنا التازي وجمعيتو بغات تعدم الفيلم الجميل للعراقي ببطولة حيمود والخنسا باطما. قال باللي هاد الفيلم "لا يمثل السينما المغربية بأي حال من الأحوال" وباللي "دار مجتمع مغربي خيالي ...تم حصره بطريقة ميكيافيلية في فئات العاهرات والقوادين ومدمني المخدرات!" اي فيلم لقحاب ولقواويد ولحشايشية.
وخلص الى ان هاد الفيلم "معادي للوطن"
واش هادو معاهم السينما. هادو راهم اصوليين فعقليتهم. اسلاميين فتفكيرهم. مشاو كثر من صحاب الفن النظيف.
صافي غسلو يديكم على امثال هادو.