المنخرط الرجاوي شوقي دخل طول وعرض فالبدراوي وقال للرجاويين ما يتسناوهش ديافع على الرجاء

دخل المنخرط الرجاوي سمير شوقي طول وعرض فرئيس الرجاء الرياضي عزيز البدراوي والمكتب ديالو، حيث باقي ما دارو حتى خطوة باش يدافعو فنظرو على الفرقة من بعد الظلم التحكيمي اللي كيشوف أنها تعرضت له فماتش الديربي مع الوداد الأحد اللي فات فالبطولة.
فمن بعدما تعطل عزيز البدراوي والمكتب المديري للنادي فالخروج والكشف على الخطوات اللي غاديين يديرو من بعدما علنو على اجتماع عاجل بيناتهم بسبب أداء الحكم سمير الكزاز فالديربي ورضوان جيد اللي كان فالفار وضربوها بسكتة من نهار الأحد حتى لدابا، قرر سمير شوقي المنخرط فالنادي يخرج ويكشف لجمهور الخضرا أن مصالح شخصية هي اللي من ورا التعطيلة ديال البدراوي فاتخاذ اي قرار، وخصوصا بالنسبة للرجاويين اللي كايتسناو التصعيد من طرف رئيس الرجاء.
وقال سمير شوقي فتدوينة هاذ الصباح على فيسبوك: "لا تنتظروا أي تصعيد من المكتب جمهور نادي الرجاء حاميه.. اللي كينتظرو من مكتب الرجاء، و الرئيس تحديداً، خروج مدوي للدفاع عن الرجاء ضد فضائح التحكيم ضد الرجاء أو للإعتراض ضد الوضع الغير قانوني لعموتة، فهو واهم و سينتظر طويل".
سمير شوقي كان واضح وأكد أن الدعم ديالو للرئيس و للمكتب اللي معه راه ما غاديش يخليه يسكت ويتغاضا عن تساهلو في قضايا كتهم مصلحة الرجاء، وكشف وقال :للأسف من الواضح أن هناك تعارض بين الدفاع عن مصلحة الرجاء و بين مصلحة شخصية تحول دون الإحتجاج القوي ضد الجامعة و مسؤليها. و لن أقول أكثر لأن شرح الواضحات من الُمفضحات، ولصحاب مئات الرسائل اللي توصلت بها و كتساءل على شنو ينتظرو مكتب الرجاء للإحتجاج و الضرب على الطاولة، كنقولهم لهم ما يحك جلدكم غير ظفركم".
واختم الرجاوي سمير شوقي الميساج ديالو وهو كيتحصر من موقف عزبز البدراوي المكتب ديالو والجمهور اللي معول عليهم يدافعو على الفرقة وقال: "للأسف، جمهور الرجاء تركوه بوحدو فهاذ المعركة، و الكرة فالمرمى ديالو، خاوص ياخذ القرار اللي كيشوفو مناسبا باش يدافع على فرقتو بالطرق القانونية و الحضارية المعروفة عليه، وبلاما يتسنا اللي غادي يجي واللي ماغاديش يجي.