الحكومة مغاديش تنازل للمحامين.. وهبي: خاص كولشي يخلص الضرائب وميمكنش نقبلو بجهة أو هيأة مبغاتش تخلص

قال عبد اللطيف وهبي، وزير العدل، البارح السبت، فلقاء حزبي بفاس، بلي "ميمكنش نقبلو تكون هيئة أو جهة أو شي نشاط مكيخلصوش الضرائب".
وهبي اعتبر هاد القضية ديال أداء الضرائب "مسؤولية وطنية"، وشدد بلي خاص كولشي يخلص الضرائب".
هاد الكلام لي قال وهبي فيه إشارة بلي الحكومة مغاديش تراجع على الضرائب لي فرضات على المحامين، واخا بعض الهيئات ديال المحامين فالمغرب رفضو الاتفاق الأخير المبرم بين رئيس الحكومة وجمعية هيئات المحامين بالمغرب.
وهبي كان كيهضر بصفتو الحزبية ولكن استغل اللقاء الحزبي باش يمرر رسائل للمحامين، بالقول: "مبقاش مقبول يكون ريع فالمغرب وتكون حقوق بدون واجبات".
وتابع "لا يمكن لأحد أن يتزايد على أحد؛ نحن نريد مجتمعا حداثيا؛ أفراده يضحون من أجل بعضهم البعض".