ديشون اللي حرم بنزيما من كأس العالم 2018 حازن عليه حيث ماغاديش يلعب معه مونديال 2022

عبر ديدي ديشون مدرب منتخب فرنسا على الحزن ديالو حيث غادي يغيب نجم منتخب الديكة كريم بنزيما على كأس العالم قطر 2022، بسبب الإصابة، وهو اللي رجعو للمنتخب فعام 2021 من بعد سنوات كان حارمو فيها من التوني ديال فرنسا.
مدرب فرنسا ديديي ديشون قال فتصريح صحافي: "أنا حازن على كريم بنزيما حيث كان كيشوف كأس العالم هدف بالنسبة ليه".
المدرب الفرنسي اللي ربح كوب ديموند فعام 2018، وخا مشا ليه بنزيما ثايق فاللعابا الأخير، وقال: "وخا هاد النكسة الجديدة اللي ضربت منتخب فرنسا، راه عندي الثقة فاللعابا الآخرين وغادي نديرو أي حاجة باش نواجهو هاد التحدي".
وكان كريم بنزيما خرج على وسائل التواصل الاجتماعي وعلن بلي ماغاديش يلعب كأس العالم مع فرنسا بسبب الإصابة وقال: "عمرني ما استسلمت فحياتي، ولكن هذا الليلة خاصني نفكر فمصلحة المنتخب كيف كندير ديما، والمنطق كيقوليا نخلي بلاصت لعاب آخر يقدر يعاون لكروب باش يدير كوب ديموند مزيان وكنشكر كلشي على الدعم والمساندة".
وكيعتبر غياب كريم بنزيما على كأس العالم قطر 2022، ضربة قوية للمنتخب الفرنسي، حيث بنزيما هو أحسن لعاب فالعالم دابا وخدا الكرة الذهبية، وكانوا معولين عليه الفرنسيين باش يقود منتخبهم للحفاظ على اللقب اللي ربحوه عام 2018، مع العلم لسخرية الأقدار فديدي ديشون مدرب منتخب فرنسا اللي حازن على بنزيما حيث ما غاديش يلعب معه كوب ديموند 2022، هو اللي بعدو من لاليست ديال فرنسا فمونديال روسيا بحجة أسباب تقنية.