مونديال 2022.. أستراليا سبقت بيت لفرنسا وندمت وجيرو بديل بنزيما دخل التاريخ

اكتسحت فرنسا بطلة العالم المنتخب الأسترالي اليوم الثلاثاء فالجولة الأولى من كأس العالم قطر 2022، وربحتها بنتيجة 4 لواحد فتيران الجنوب فمدينة الوكرة القطرية.
الأستراليون دخلو مجهدين فالماتش وصدموا فرنسا بالبيت الأول فالدقيقة 8 اللي ماركاه كريك كودوين، من بعدها ديدي ديشون واللعابا الفرنسيين بداو كيقلبو على الحلول ونجحو من خلا أدريان رابيو فتعديل النتجية بهدف فالدقيقة 27، من بعد منها غادي يهز مبابي وصحابو الريتم وغادي يماركي لهم اوليفي جيرو البيت الثاني فالدقيقة 36، وهاكذا سالا الشوط الأول بنتيجة 2 لواحد.
وفالشوط الثاني غادي يتزيد فرنسا 2 بيوتا، ماركا لها الثالث مبابي فالدقيقة 68، ورجع جيرو ضرب لها الرابع فالدقيقة 71، وبهاد الهدف اللي ماركا جيرو صبح هو البيتور التاريخي ديال منتخب فرنسا بالمناصفة مع الأسطورة تيري هنري برصيد 51 بيت لكل واحد منهم، وجيرو اللي عندو 36 عام وهو أكبر لعاب فالسن فتاريخ فرنسا كيلعب كأس العالم، وعندو فرصة باش ينفرد بالهداف التاريخي ديال بلادو فهاد كوب ديموند، مع العلم أنه كان غادي يكون بديل ديال كريم بنزيما فهاد النسخة كون ما توعتش مهاجم ريال مدريد.
ونجحت فرنسا بطلة العالم 2018 بهاد الرباح فتحقيق بدية مزيانة فكأس العالم 2022، عكس النسخة ديال 2014 وديال 2018 اللي خسر فيهم حامل اللقب أول ماتش، ودابا المنتخب الفرنسي عندو 3 النقاط وكيتصدر الكروب 4، تابعها تونس والدنمارك بنقطة لكل واحد منهم وأستراليا هي الأخيرة بزيرو نقطة.