الإسبان سعرو قبل ماتش المغرب ووصفو المنتخب المغربي بمنتخب الأمم المتحدة.. واش هادي كلها خلعة؟

اختار الإعلام الإسباني يخرج ماتش منتخب بلادو أمام المغرب فثمن نهائي كأس العالم قطر 2022، من السياق الرياضي ديالو وتجرو للتحريض والعنصرية تجاه اللعابا المغاربة والمغرب.
وفمقدمت وسائل الإعلام الإسبانية اللي واخدا ماتش منتخب إسبانيا بعدوانية ضد المغرب، جريدة "LAVANGUARDIA"، واللي وصفات المنتخب الوطني المغربي بمنتخب الأمم المتحدة، فتلميح منها زعما لكون عدد مهم من اللعابا المغاربة اللي كيدافعو على التوني المغربي تزادو خارج المغرب فبلدان أخرى.
وقالت الجريدة العنصرية بلي 16% من اللعابا اللي مشاركين فكأس العالم 2022، لاعبين مع منتخبات ما تزادوش فبلدانهم، أي 137 لعاب من أصل 832 لعاب فهاد النسخة.
وبقات الجريدة كتدخل وتخرج فالكلام باش توصل عند المنتخب الوطني المغربي، وقالت بلي المنتخب المغربي نموذج ديال اللعابا اللي اختارو يلعبو له وما يلعبوش لمنتخبات البلدان اللي تولدو فيها، وقالت بلي العدد ديالهم هو 14 لعاب ووصفتهم بالأجانب حيث تولدو خارج المغرب، ونعثت المنتخب الوطني المغربي واللي غادي يلعب معه منتخب بلادها الثلاثاء الجاي فثمن نهائي كأس العالم بمنتخب الأمم المتحدة.
وكايبان من خلال هاد التقرير المجانب للصواب ديال الجريدة المذكورة، واللي شابع كذوب، الحسد والخوف ديال عدد من الإسبان تجاه المغرب، خصوصا وأن المنتخب الوطني المغربي صبح كيتمتع بلعابا مغاربة الأصل سوا من كلا الوالدين أو من جانب الأم أو الأم، وصبحو اللعابا من أصل مغربي فأوروبا كيحلمو يلعبو للمنتخب المغربي وكيفضلوه على منتخبات الدول اللي تولدو فيها فحال إسبانيا وبلجيكا وفرنسا وهولندا وغيرها.
وسقطت الجريدة المذكورة من خلال تقريرها فالتناقض حيث المنتخب الإسباني ديما كان كيضم فالصفوف ديالو لعابا من أصول ماشي إسبانية والاتحاد الإسباني كيضغط على بزاف من أبناء المهاجرين فإسبانيا باش يلعبو بالتوني ديالها فحال منير الحدادي المغربي الأصل واللي رجع من بعدها ولعب مع المغرب والبرازيلي دييكو كوستا والصربي بويان كريكيتش وتياكو ألكنتارا واللي حتى هو برازيلي والقائمة طويلة.
https://www.lavanguardia.com/deportes/futbol/mundial-qatar-2022/20221204/8633219/mundial-qatar-espana-marruecos-analisis-seleccion-onu-nacidos-fuera-de-su-pais.html