محلل الفيديو المغربي موسى الحبشي خلق الرعب فبلجيكا قبل الماتش حيث كيعرفهم واحد بواحد (تصاور)

كيحس الطاقم التقني ديال منتخب بلجيكا بنوع من القلق قبل ماتش المنتخب الوطني المغربي اليوم الأحد، فالجولة الثانية من كأس العالم 2022، حيث خايف تكون الأسلحة ديالو مكشوفة للمغاربة فهاذ الماتش الحاسم.
الإعلام البلجيكي تكلم على واحد النقطة مهمة وكيشوف بلي هي نقطة ضعف كبيرة ديال منتخب بلادو ضد المغرب وتقدر تكون هي مفتاح الرباح ديال المغاربة عليهم فهاد الماتش، والأمر كيتعلق بموسى الحبشي محلل الفيديو فالمنتخب الوطني المغربي واللي سبق له كان خدام مع المنتخب البلجيكي ومع المدرب ديالو روبيرتو مارتينيز.
موقع "walfoot" البلجيكي تكلم على موسى الحبشي محلل الفيديو فالطاقم التقني فالمنتخب المغربي والدور اللي يقدر يلعب باش النتيجة تكون فالماتش لصالح المغرب ضد بلجيكا، وقال بلي الحبشي كيعرف المنتخب البلجيكي فحال إلى كيعرف الجيب ديالو شنو فيه، حيث خدم معاه ومع روبيرتو مارتينيز وكيعرف مزيان اللعابا وكان من الناس اللي ورا تحقيق إنجاز 2018 ملي وصلات بلجيكا للمركز الثالث فمونديال روسيا، قبل ما يخليها عام 2020 باش يجي يخدم مع المنتخب الوطني المغربي بعقد حتى 2025.
الموقع البلجيكي بين التخوف ديال البلجيكين بزاف من موسى الحبشي، وأكد بلي الإطار المغربي اللي خدم مع المنتخب البلجيكي والفرق البلجيكية كيعرف مزيان المنتخب ديالهم وروبيرتو مارتينيز المدرب ديالو، وقال بلي الحبشي غادي يشكل عليهم خطر كبير حيث هو على دراية بنقاط القوة والضعف ديال منتخب بلجيكا، وماغادش يعطلهم حيث اكيد غادي يعطيها للطاقم التقني ديال المنتخب المغربي ويخدمو عليها باش يربحو الماتش.
وغادي يلعب المنتخب الوطني المغربي اليوم الأحد ضد بلجيكا فتيران "الثمامة" جنوب العاصمة القطرية الدوحة، وهو ماتش مهم للمنتخبين، وكيسعى وليد الركراكي والطاقم التقني ديال المنتخب الوطني المغربي باش ومعهم محلل الفيديو موسى الحبشي يربحو ويحافظو على الحظوظ المغربية فالتأهل للدور الثاني.