السياسة حاضرة فماتش اليوم بين الاسود وبين الديكة. ماتش مع ازمة سياسية وتنامي كره مغربي لباريس بسباب الڤيزا

البارح الثلاث 13 دجنبر 2022 تفادى مدرب الاسود وليد الركراكي يهدر على السياسة فماتش المغرب ضد فرانسا عن نص نهاية كأس العالم قطر 2022. تفادى يجبد التاريخ اللي كيخرج مرة مرة بين الدولتين. قال باللي هادا ماتش الفوت وخاصو يدوز فاجواء احتفالية وكلشي يفرح فاللخر. يهدر "بوليتيكمون كوريت" وصافي.
ديشان مدرب فرانسا حتى هو تفادى يجبد الاستغلال السياسي لهاد الماتش من قبل اليمين المتطرف الفرنسي. هدر غير على الكورة.
الركراكي وديشان تفاداو المواضيع اللي كتبرزط بين باريس وفرانسا. جوج دول عندهم علاقات كتطلع وتنزل بسباب التاريخ =الماضي الاستعماري= والحاضر =عدد الفرنسيين من اصل مغربي=.
فقنوات فرانسا كاين نقاش طاغي فيه احداث عرفتها باريس بعد تأهل الاسود لنص النهاية فهاد المونديال. اليمين المتطرف شعل العافية. وزير الداخلية بغى يبرد السوق وهدر علي ماتش بين جوج الدول عندهم علاقة مزيانة
لكن واش علاقتنا مزيانة مع باريس؟ سياسيا طبعا اللا. الدليل ان المغرب ما عندوش سفير فهاد الدولة. بعد تعيين محمد بنشعبون مؤخرا كمدير لصندوق محمد السادس للاستثمار والمنصب فارغ. عدم اتخاد فرنسا موقف متقدم من الصحراء وتفضيل محور باريس الجزائر على محور الرباط باريس٬ خلى العلاقات تبرد. باردة سياسيا بزاف.
ماشي غير السياسي اللي فيه مشكلة. هاديك الطبقة المتوسطة الفرنكفونية اللي ديما كتشكل قوة لحضور فرانسا٬ حتى هي كاعية وبزاف على هاد الدولة. مع قرار السلطات الفرنسية تخفيض منح تأشيرات للمغاربة بسباب ما اعتبرته رفض الرباط عودة قاصرين٬ خلى هاد لمغاربة يحقدو علي الدولة اللي ديما كتعبجهم.
هاد الفئة حاضرة بزاف اليوم فقطر. غادية تشجع بزاف الاسود وبحماس زايد. كتمنى ان الاسود يفتارسو الديكة وينتاقمو ليهم من تصرفات حكومة باريس.
شي قنوات فرنسية قالت باللي الانتصار علي فرنسا فماتش اليوم كيعني استقلال جديد وفاليتران من هاد الدولة. فوجدان لمغاربة هاد كلام ماشي خاطئ. كلشي باغي يربح المستعمر السابق لبلادنا. رباح فيه نوع من التحرر من ماضي ما عمرو سالى.
اليوم ماشي ماتش تاريخي للاسود غير فالكورة. راه فيه السياسة والجغرافيا والتاريخ وكاين اللي مدخل فيه حتى الدين.