مصدر ل"كود": والدة سفيان بوفال وصلات لباريس ولاباس عليها. هاد الام الرائعة تستحق استقبال ملكي

قال مصدر ل"كود" ان والدة اللاعب سفيان بوفال احد نجوم الاسود في المونديال القطري٬ وصلات لدارها فباريس. ام بوفال اللي تشهرات بزاف بزاف بعد رقصتها مع ولدها وكاع صحف العالم نقلات الصورة٬ كانت دارت عملية جراحية فقطر. بقات حتى استرجعات عافيتها بعد ما نجحات العملية.
هاد العملية كانت خلاتها ما تحضرش للاستقبال الملكي الزوين لامهات اللعابة فالقصر الملكي بعد ما عطا سيدنا للاسود اوسمة.
عادل اخ سفيان نشر صورة لوالدتو وكتب عليها "الحمد لله. راه لاباس عليها بزاف". تدوينة باش تكذب اشاعات روجوها عليها.
فكرة استقبال سيدنا للعابة المنتخب مع امهاتهم جات بعد ديك الشهرة اللي خداتها صورة ام بوفال مع ولدها وصورة حكيمي معنق امو....
هاد الام باش تسترجع صحتها تستحق استقبال ملكي تحرمات منو بسباب العملية اللي دارتها فقطر