جورنال إسباني: مسودة غادي تقدم للبرلمان الأوروبي فيها أن تقارير المخابرات ديال مدريد ما لقات حتى علاقة بين المغرب والتجسس على سانشيز والوزرا ديالو

نشر موقع "أوكي دياريو" مسودة تقرير غادي يتقدم للبرلمان الأوروبي حول التحقيق فتاثير برمجية بيكاسوس على العلاقات الخارجية للاتحاد الأوروبي، فيه أن تقارير المخابرات ديال مدريد ما لقات حتى علاقة بين المغرب والتجسس على التليفونات ديال بيدرو سانشيز والوزرا ديالو. واللي كيعني بلا مرواغات إنشائية أن المغرب بريء من هاذ الاتهامات اللي خلاتو يمشي لمحاكم أوروبية ويقاضي جهات إعلامية كيجري فدمها العداء للمملكة.
وحسب "أوكي دياريو"، التقرير عبارة عن مسودة من 67 صفحة فيها إشارة إلى عدم تفاعل مدريد و"عدم اتخاذ سانشيز أي إجراء ضد المغرب بعد الكشف عن التجسس". هاذ مسودة التقرير ديال "عيني فيك"، واللي بالتزامن مع القرار الأخير ديال البرلمان الأوروبي ضد المغرب فيه إشارة إلى أن الإجراءات المماثلة اللي تقدر تديرها دول أجنبية ضد شركاء الاتحاد الأوروبي تقدر تتسبب في تغييرات خطيرة في العمليات الانتخابية أو ابتزاز كبار المسؤولين السياسيين باستغلال المعلومات الشخصية والخاصة.
هاذ مسودة التقرير فيها نبرة انتقاد لمدريد بصفتها حليفة رئيسية للمملكة داخل مؤسسات الاتحاد الأوروبي واللي كان عليها "تأخذ إجراءات انتقامية ضد المغرب في غياب أدلة ملموسة ومادية على تورط المغرب"، حسب المصدر ذاته.
هاذي حرب سياسية ضد المغرب والحليف الأوروبي ديالو بسباب موقفو الإيجابي من قضية الصحرا، وهاذ الشي وضح كثر مع الهجومات الإعلامية اللي تعرضو ليها مؤخرا، نواب الحزب الاشتراكي الإسباني داخل البرلمان الأوروبي اللي صوتو ضد القرار المهزلة الأخير، وأيضا، ضد رئيس الدبلوماسية الإسبانية اللي قالو أنه تعرض لضغوط قوية من بوريطة لتوجيه النواب داخل البرلمان الأوروبي.
https://okdiario.com/espana/investigacion-ue-sobre-pegasus-senala-sanchez-porque-no-reacciono-frente-marruecos-10315009/amp