العرض الاول ل"ضاضوس". الممثل المعروف ادريس الروخ نكرة ما يستحقش حتى يگولو اسمو

البارح 7 فبراير 2023 كان العرض الاول لفيلم "ضاضوس" للمخرج عبد الواحد مجاهد ف"ايماكس" بموروكو مول فكازا. ما نهدروش لا على الفيلم. هادي قضية اخرى.
فهاد التقديم هدرو على كلشي. ماشي غير على اللي لعبو البطولة واللا. على اللي بان غير شي تواني قليلة وحتى هادوك اللي قدمو الدعم او المساعدة لاول عمل سينمائي لهاد المخرج عرضو عليهم يطلعو =او يهبطو= للتقديم باش ياخدو صورة جماعية ويصفق عليهم الجمهور. لكن باش بدا الفيلم كانت الصدمة. ممثل معروف وقافز ومسرحي ومخرج سينمائي لعب فهاد الفيلم وما داروه لا فلافيش ولا جبدو المخرج او ديال دوزيم صامد غيلان٬ كنهدرو على ادريس الروخ.
فهاد الفيلم لعب دور محقق، تآنسبيرا من "كولومبو" الشهير.
هاد التجاهل لفنان كبير دار اللي عليه فهاد الفيلم٬ كيمس المخرج ماشي الروخ. يقدر يكون بيناتهم شي صداع كبير ولكن ما يمكنش تتجاهلو بهاد الطريقة