اش هاد الوزرا. بايتاس ناطق باسم الحكومة صامت خلى غلا الخضرة وباغي ينظر فالاعلام فالجامعة والصديقي وزير مغرور ما قدرش يتحزم للمضاربين فالاسعار لي دايرين لفضايح

بعض وزراء الحكومة ناعسين. العافية فالسوق ولمغاربة كيتشكاو فيما مشيتي وهما ضاربين طم وما بغاوش يخرجو يشرحو للمغاربة اش واقع او على الاقل يقولو ليهم سمحو لينا راه مقادرينش نتحكو فالأزمة.
ضاربين الطم فالوقت لي كاين تقرير برلماني على سلاسل التسويق ديال المنتجات الفلاحية، تقرير كحل قريب يخرج، فرش كولشي خصوصا الفضايح لي كيوقعو فاسواق الجملة والجرائم لي كيديرو السماسرية والمضاربين فهاد الاسواق لي كتكون مداخليها بالملايير شهريا. ماشي غير التقرير البرلماني لي فضح هادشي، ليلى حموشي كشفات مديرة المرافق العمومية بوزارة الداخلية، اختلالات خطيرة بأسواق الجملة للخضر ومجازر اللحوم والأسواق العمومية، وقدمت الحلول المقترحة لتجاوز هذه الاختلالات، حسب يومية الأخبار في عددها الصادر الجمعة 30 شتنبر الجاري.
محمد الصديقي وزير الفلاحة٬ مغرور. اختار يدير قرارات فشي شكل ومنع تصدير ماطيشا والبطاطا والبصلة لافريقيا، قرارا غايكون عندو تبعات خايبا على العلاقات مع الدول الافريقية. فالمقابل مخلي كولشي يمشي لأوروبا.
القرار دارو بلا ما يتواصل. هادا وقتو يخرج. يشرح اش واقع. شكون مغلي وعلاش غالية ماطيشة او بطاطا.
اما واحد ناطق رسمي باسم الحكومة مصطفى بايتاس فما بقاش حتى وزير لغة الخشب. حتى هاد اللغة ما بقيناش كنسمعوه فيها. فرحان براسو وقاليك دكتور وغادي يمشي نهار 18 فبراير لجامعة ابن طفيل فالقنيطرة باش يدير درس افتتاحي حول التواصل السياسي فظل الاعلام الرقمي. اش من تواصل. فين هاد التواصل. ما كانش اليوم لاش يصلح لغدا
هاد بايتاس كيشبه الاسلاميين بزاف، كيعجبو لي يسميه دكتور، كيعجبو لي يتملق ليه بدوك الصفات ديال "الاخ" وينافقو بتادرويشيت. وحتى هضرتو كتشبه ليهم. كيشبههم فاللا فعالية وكثير من الادعاء