هاكاوا على التفرعين وتحدي القانون قدام مقر الوالي اليعقوبي..بنتلي بوحدها سطاسيونات فبلاصة ممنوعة

التفرعين وتحدي القانون عند شي وحدين مكيساليش، فالعاصمة الرباط، طوموبيل من نوع بنتلي وقفات قدام مقر ولاية جهة الرباط سلا القنيطرة، فبلاصة ممنوعة ومور بلاكا ديال ممنوع التوقف.
هاد مول او مولات الحديدة الواعرة، باينا عندها شي كالا صحيحة باش تجي تال قدام مكتب الوالي محمد اليعقوبي وتحداه واخا معروف عليه بلي مكيعقلش على صحاب الجاه والمال والتفرعين، كولشي شاف كيفاش طبق القانون على المخالفين للقوانين سواء من صحاب المطاعم الفاخرة وصحاب الفيلات الفاخرة فالرباط.
الولاية لي فيها المسؤولين على النظام العام فالرباط، واللي فيها طبعا حتى المسؤولين على السير والجولان، قدامهم جات بنتلي تحداتهم.
شي سلوكات كترجع البلاد اللور، بحال هاد بنتلي وبحال الازبال لي منتشرة فأحياء العاصمة منها حسان وبحال خروقات التعمير لي فيها الفضايح.