الاسود ربحو "تاريخيا" "آلهة" الكورة فليلة كبيرة بطنجة. جمهور استثنائي فيه نسبة مهمة من لعيالات وتنظيم كبر ببلادنا

سالى قبل قليل ماتش ودي ولكن كان كبير بزاف بين الاسود والبرازيل. وليدات الركراكي ربحو "الهة كرة القدم" وبالاداء. ربحوهم بجوج لواحد. كان الاسود يخرجو رابحين بجوج لزيرو كون الحارس بونو ما دارش خطأ فالشوط الثاني خلى كاسيميرو يماركي التعادل٬ قبل ما يماركي الصابيري هدف الفوز فالدقائق العشر الاخيرة من الماتش.
البرازيل دخلات بنجومها٬ غاب عليها نايمار اللي موعت٬ ولكن حضرو نجومها لخراين
الاسود دارو ماتش كبير بزاف. حيحو. ضغطو. تحكمو فوسط الميدان. الدفاع كان واعر خاصة سايس ونايف اكرد. الوسط الدفاعي ما نهدروش على امرابط. كيف ماتشات المونديال لعاب كبير بزاف. باقي اللعابة دارو ماتش كبير بزاف.
هاد الفوز تاريخي ماشي حقاش ربحنا المنتخب اللي فالرتبة 1 فتصنيف الفيفا وصافي٬ اللا. حقاش اول مرة لمغاربة كيماركيو على البرازيل
الماتش اللي دار الليلة فطنجة عرف حضور كبير. جمهور مختالف على جماهير الملاعب فالبطولة الاحترافية. نساء كثار حضرو حقاش حسو بالامان. راه الادارة العامة للامن الوطني وجدات لهاد الماتش 5700 رجل امن باش كلشي يدوز مزيان.