غير ماركا مع تشيلسي بدا لغوات: زياش بلاصتو فالكاميرون. وا بنادم راه وحيد اللي كيقدس الدرابو حسم. من حدو مدرب ما يلعب معاه الا اللي كيموت على بلادو وكيعرق التوني

غريب حال لمغاربة. منتخبهم لاعب غدا ماتش ثمن نهاية كأس افريقيا فياوندي ضد الملاوي والمنتخبات المؤهلة كلها مكونسوتريا على الماتشات وواحد الفئة عندنا كتهدر على حكيم زياش. على ضرورة رجعو. كيگولو ويعاودو "بلاصتو كاينة". عا گولو لي فين بلاصتو كاينة. فهاد المنتخب؟ يستحيل يلعب فيه بلا ما يبدل تصرفاتو ووحيد مدرب.
هاد الشي جا بعد ما ماركا بيت زوين البارح الاحد مع فرقتو تشيلسي ضد توتنهام فالدورة 23 من برميير ليگ.
ربح فقرتو اللي ما ربحاتش هادي 4 الماتشات. لعب مزيان. ولكن ما عندوش بلاصتو فهاد المنتخب. ما كنهدروش غير على الكورة. المدرب وحيد دخل بوفال وخلاه يهاجم ويدافع ويتحرك. ما يوقفش. حمسو وشجعو.
راه المدرب وحيد اللي عندو تقديس للعلم للتوني ديال المنتخب حقاش عارف اش كتعني دولة. عارف اش كيعني درابو وهو اللي حارب فحرب البوسنة ضد الصرب باش بلادو تولي مستقلة. يولي عندها علم.
كان نجم كبير فالكورة وخلى كلشي هز السلاح وتضرب بالقرطاس. يعني ما يجيش شي حد ويزايد عليه فمفهوم الوطنية.
وحيد كان قال بعد اول ماتش للمغرب ضد غانا فهاد الكان الكاميروني كلام واضح. قال "اللي ما كيحتارمش المنتخب. ما كيحتارمش المايو ديال المنتخب ما يمكنش يلعب فالمنتخب وانا كاين".
وحيد عاود ووضح "راه ماشي زياش اللي كيختار. راه المنتخب اللي كيختار شكون يمثلو". قبل ان يرد بوضوح اكثر:"ما يمكنش يلعب فشي دولة"، فاشارة الى ما قالو زياش باللي كان عندو اختيار يلعب فشي منتخب اخر. وقال وعاود باللي "خاص الموهبة تكون فخدمة الوطن".
قبلو رئيس الجامعة الملكية المغربية لكرة القدم قال راه تلعب للمنتخب ماشي قضية فلوس. راها قضية شرف" واضاف "حتى واحد عندو الحق يهين التوني. راه شرف ومسؤولية".
بهاد الوضوح كولو راه الموضوع تسد. شوفو الفرق بين حكيمي وبين زياش. حكيمي لعاب عالمي وكيموت على التوني وكيعرق فالماتشات ومنضابط لقرارات المدرب. عسكري صافي. وفوق هاد الشي ما كيعطي لا تصريحات ضد المنتخب لا والو. ختار وحسم. علاش زياش ما يتعلمش منو.