منين خرج هاد عمور اللي حلمو يكون بحال لمجرد. بواحد التعجرف قال بالمصرية خاص مدرب الاسود يمشي فحالو

حاتم عمور مغني متصنع. كلشي اللي كيديرو تصنع مدردر بالغباء. هادا اللي حلمو يكون بحال سعد لمجرد خرج مع القناة السعودية "ام بي سي" باش يهدر على المنتخب المغربي لكرة القدم. طبعا من حق اي مغربي يهدر على مدرب بلادو. تجي من واحد ما مقادش حتى خدمتو شوية فشي شكل.
هاد السيد ادعى بنجاح اغنية ما كيعرفوهاش لمغاربة. حگر على مقدمة وقال ليها باللي غنى اغنية على الاسود فتأهلهم لمونديال روسيا. هاد بنادم قال بلهجة مصرية متصنعة بينات مستواه واستلابو بثقافة الغير "غنيت اغنية گامدة گدا" واييه گالها هاكا كيف تكتبات.
الجمود راه فعقليتك يا اللي ما فيدك فالابداع ما فيدك فالهدرة، وكلامك بهاد اللهجة كتبين معدنك. اللي ما كيحتارمش لوغتو وثقافتو راه عندو احساس بالدونية. ما علينا من هاد الشي.
هاد المتصنع المستلب المهووس بثقافة مصر بغى مدرب الاسود وحيد خاليلوفيتش يمشي فحالو. السبب ما استدعاش حمد الله وزياش ومزراوي...
المغرب يا هادا اللي مغني بلا ابداع راه تأهل وداز لمونديال قطر مع مجموعة من اللعابة. ايلى دخلنا فهاد المنطق وتبعنا امثال هاد عمور٬ مشى فيها المنتخب. غاديين فالطريق اللي مشى فيها المنتخب الجزائري. كتعرفو اش ورا هاد الطريق. الحيط.