شعلات على البقاء فالبطولة.. الجديدة خسرات فتيرانها مع آسفي و وجدة ربحت الماص

شعلت في أسفل ترتيب البطولة الإحترافية لكرة القدم مع افتتاح الدورة 23، واللي عرفت إقامة 2 ماتشات يوم الجمعة 14 أبريل، الأول جمع بين الدفاع الحسني الجديد والضيف ديالو أولمبيك آسفي والثاني بين مولودية وجدة والضيف ديالو المغرب الفاسي.
وخسر الدفاع الحسني الجديد الماتش مع أولمبيك آسفي بنتيجة واحد لزيرو بملعب العبدي بالجديدة فماتش غاب عليه الجمهور المسفيوي حيث ممنوع من الديبلاصمون للجديدة، وماركا هدف الرباح لأولمبيك آسفي اكسيل مايي في الدقيقة 30.
الرباح ديال أولمبيك آسفي على الدفاع الحسني الجديد، مكن الفريق من الحصول على 3 بوان رفع بها الرصيد ديالو إلى 39 وعزز بلاصتو في المركز الرابع، أما خسارة الدفاع الحسني الجديد فخلات الفريق يصبح قريب من مراكز الخطر والدكاليين بقات عندهم 22 نقطة وتراجعو إلى المركز 14، وعلى بعد 5 النقاط من خريبكة صحاب المركز 15 و 8 النقاط على اتحاد طنجة اللي في المركز الأخير.
وبالمقابل وفي نفس الوقت، حقق فريق مولودية وجدة رباح مهم وفاز على المغرب الفاسي بالملعب الشرفي لمدينة وجدة، بنتجية 2 لواحد.
وسجل مولودية وجدة الهدف الأول في الدقيقة 23 عن طريق أنس سرغات، والمغرب الفاسي ماركاو التعادل بواسطة عماد الرياح من بيلانتي في الدقيقة 53، ولكن الوداديين رجعوا وضربوا هدف الرباح عند طريق هشام مرشاد في الدقيقة 65.
الرباح ديال مولودية وجدة مكن الفريق من الحصول على 3 بوان رفع بها الرصيد ديالو إلى 23 نقطة وخذا المركز 13 فبلاصت الدفاع الحسني الجديد، أما المغرب الفاسي فتجمد الرصيد ديالو من بعد هذه الخسارة في 29 نقطة وكحيتل الفريق المركز التاسع.