محمد الشرقاوي دشن رئاستو لإتحاد طنجة بخسارة مع الجديدة وفريق عروسة الشمال كيزيد يغرق

افتتح محمد الشرقاوي المرحلة ديالو كرئيس لاتحاد طنجة بالخسران، من بعدما انهزم فريق عروسة البوغاز مع الدفاع الحسني الجديدي اليوم الأربعاء فتيران العبدي بالجديدة، ضمن الجولة 13 من منافسات البطولة الإحترافية لكرة القدم.
فريق الدفاع الحسني الجديدي قدر يربح الماتش بنتيجة 2 لواحد، وماركاو الدكاليين الهدف الأول فالدقيقة 26 بواسطة رضا لخميدي، وكانوا قريب يسجل الهدف الثاني فالدقيقة ولكن الدكالي مسعود جوما ضيع بيلانتي فالدقيقة 37، وظلت النتجية كما هي حتى سالا الشوط الأول.
وفالشوط الثاني، قدر إتحاد طنجة يرجع فالنتيجة وجاب التعادل بواسطة زكرياء كرياني فالدقيقة 62، وفالوقت اللي ظن كلشي أن الطنجاويين فاقو قدر الدفاع الحسني الجديدي يتقدم مرة أخرى فالنتيجة وسجل الهدف الثاني بتسديد جميلة ديال عبد الله فرح فالدقيقة 77، وظلت النتجية كما هي عليه حتى سالا اللقاء.
وبهاد الرباح تحصل الدفاع الحسني الجديدي على 3 نقاط، ورفع رصيدو إلى 20 نقطة وصعد إلى المركز 5، أما إتحاد طنجة بهاد الهزيمة زاد غرق فأسفل الترتيب وهذا هو الماتش 11 اللي خسر فهاد الموسم من 13 مواجهة لعب مقابل 2 تعادلات، والفريق مازال حقق حتى رباح ملي بدأت البطولة وعندو 2 نقاط.