واش ممكن الرباط تيق فسانشيث؟ اللا. راه سياسي قادر يقلب الڤيستا باش يحافظ على اغلبيتو اللي نايضة ليه ولكن وراق المغرب كثيرة ولاعب مرتاح بزاف

سانشيث رئيس الحكومة الاسباني يسافر هاد العشية =الخميس 7 ابريل 2022= للرباط مع وزير خارجيتو. معزول. بوحدو. بدون دعم من الكونگريسو. بضغط من شركاؤ اللي كيطالبوه بتصحيح "الڤيراج" اللي دارو بخصوص الصحراء.
لقاؤو هاد الصباح مع زعيم المعارضة اليميني البيرطو نونياس فييخو رئيس الحزب الشعبي٬ يقدر يكون اكبر سند ليه فهاد الرحلة للرباط. اللقاء كاين دابا فقصر "مونكو" بمدريد.
رحلة غادي يتلاقى فيها مع الملك محمد السادس بالقصر الملكي بالرباط مع الخمسة ونص ويقدر يبقى الاجتماع جوج سوايع. بعدها غادي يفطر مع الملك.
غادي يعطي تصريح للصحافة بعد لقاؤو برئىس الدولة.
لكن سانشيث٬ كيف قلنا٬ مسافر بلا دعم سياسي ليه. كلشي تخلى عليه فقضية تغيير حكومتو للموقف من الصحرا. فرسالة كان رسلها للملك هادي جوج سيمانات تقريبا كان علن على تغيير تاريخي فموقف الجارة الشمالية من قضية الصحرا. اسبانيا طوات مع هاد الحكومة "تقرير مصير الشعب الصحراوي" وعوضاتو ب"الحكم الذاتي تحت السيادة المغربية".
اسبانيا بثقلها التاريخي باعتبارها القوة الاستعمارية للصحرا بحال هاد القرار زلزل الحياة السياسية واخا سبق لرئيس حكومة اسباني هادي سنوات =ثاباتيرو= دعم مشروع الحكم الذاتي= كيفما سبق لحكومة راخوي اليمينية حتى هي دعمات مشروع الحكم الذاتي ولكن بلا ما يمشيو بعيد فدعم مغربية الصحرا كيف دار شانشيث اليوم
هاد الڤيراج التاريخي فموقف الدولة الاسبانية خلى رئيس الحكومة بوحدو. كيسافر اليوم ويتلاقى بالملك محمد السادس بلا دعم الكونگريس. بلا دعم حتى اللي معاه فالحكومة "بوديموس" =اليسار المتطرف= وباقي حلفاءهم من اليسار الجمهوري الكاتالاني وبعض الاحزاب القومية.
طبعا هادو ماشي ساكتين. وقع البارح فالكونگريسو تحرك هاد الاحزاب المدعمة للحكومة باش يصحح الاشتراكيين موقفهم من الصحرا. باش يتراجعو على دعم الحكم الذاتي ويبقاو داعمين تقرير المصير.
طبعا مع سانشيت كلشي ممكن. المغرب طبعا ما تايقش فيه. عارفو كسياسي ممكن يدير اي قرار باش يحافظ على اغلبيتو. اليوم ما كاينش تهديد ليها. "بوديموس" سبق وقال باللي غادي يبقى فهاد الحكومة. لكن ايلى حس بالخطر محتمل جدا يتراجع على موقفو بخصوص الصحرا او يعدلو. طبعا ثمن هاد الشي غادي يكون يخاطر بصفة نهائية بعلاقاتو مع المغرب.
الرباط لحد الان ذكية بزاف فتعاملها. ساكتة ما قالت والو. ما التزمات بوالو. هاد السياسة خلات الضغط على الاشتراكيين اللي فالحكم باسبانيا ماشي علينا. المغرب فيدو اوراق كثيرة. الهجرة ووضعية سبتة ومليلية اللي ممكن يزيد يخنقها اقتصاديا والتعاون الامني خاصة فمحاربة الارهاب والجريمة المنظمة....