حديث الزلافة الحريرية الرمضانية - 3 -

حديث الزلافة الحريرية الرمضانية في وصف عشاق الاستوزار ومن هم في لائحة الانتظار ""
)الحلقة الثالثة)
جائزة قناة الحريرة للأفلام الخاسرة
بطولة : حبوب الدنفراوي
سيناريو وحوار: محمد
القصة : سعيد
الإخراج : الوافي
اللقطات الخارجية: حميدو المسالي قبو
الموسيقى التصويرية : علال النفار
إنتاج : دار المصائب للأفلام المزورة
بعد العياذ بالله من الشيطان الرجيم والصلاة والسلام على سيدنا محمد سيد الخلق وخاتم النبيئين و المرسلين صلى الله عليه وسلم وعلى آله وصحبه أجمعين.
قرقبوا عليها سوارت الربح ولي ما صلى على النبي يمشي لجهنم.
أيها الوزراء لكم مني سلام من الله , تفوح منه رائحة الكرافس والحمص والعدس .. وقبل ما نبدا الحديث في هذه الزلافة الوزارية ( وهي راه ماشي زلافة فالحقيقة راها قصرية واشمن قصرية ) سمحوا لي باش نعتذر منكم .. سلامي ليكم ما فيهش ريحة اللحم وتقول .. لأنكم كليتو ومششتو ورميتو العظم وحلفتو على والدينا عمر ريحت الغنمي لا شمناه وانتم عايشين.. آسيدي ما كاين مشكله الغنمي خليناه للغنمي..باراكا علينا غير الماكلا فبعضياتنا حتى نتقاضاو ويجي شي نهار ما تلقاو على من تتوزروا..وتقرروا باش تديرو وزراء على بعضياتكم ..مثلا :
إيوا باراك راه حريرتنا لا تتحمل ذكر كل الوزراء.. تيران تاع بنادم كلهم وزراء .. وزراء أكثر من الشعب..وتأكدوا أنكم وانتم تشكلون هذه الوزراة أن تكون الأبواب مقفلة والنوافد موصدة, وتأكدوا أن لا أحد منكم يحمل تلفون فيه كاميرا .. لأن معظم ما يخرج إلى الصحافة يخرج منكم .. حنا ما تانكونوش معاكم , احنا تنشموا غير رحة الشوا تيقولو لينا الوزير الفلاني ذبح والثاني سلخ و كنسكمعوا خبيرات منها الصادقات ومنها الكاذبات, ردوا بالكم راه يوتوب كيفضح العيوب والقناص عساس وحضيو راسكم من البردة إلى تاتجي بعد سخونية الراس.
الحديث :
حدثنا سائق طاكسي عن امرأة ركبت معه في الرباط عن زوجها الخياط عن أحد أصدقاءه من الخياطين أنه سمع أحد الوزراء القدامى يقول لأحد الوزراء الجدد:
" إسمع آولدي الحرفة كتبغي العياقة والفهامة والفطانة, لا تقرب للكبدة خليك في البداية غير فالبطانة, لاتخربق مع الكبار ولا تخسر مع البوليس والجادارمية والديوانة.. راه الوقت تبدلات والحالة عيانة..كانت القصرية زمان كبير تاكل الكرش وتبات شبعانة.. دابا الحال راه تبدل والوقت تعجل وإلى يفرط يكرط ويتبهدل .. إلى ما لحقتي الغنمي ديرليك شويا تاع العجل.. وخبي للزمان علاش تعول. ادخل للوزارة إنت الأول.. باش يقولو عليك مجتهد لا تغوت ولا تغوفل , ابحث في المكاتب, دور فالكولوارات وسول.. راه كولوارات الوزارات خبارها تيبدا من الأخر ماشي من الأول.
إلى وصلاتك خبيرات تأكد قبل ما تهرول, حضي راسك من الصحفيين وخصوصا الصحافيات راه نيوفهم شمامة كطلع التقلقيلة وخبارك في الجورلانات تبات.
لا تكثر فالهضرة وكل عام ديرليك حجة أو عمرة .. باش يقولو عليك الوزير الحاج.. يبندقليك البوليس فكل فيراج.. ها ودني منك راه خباري عندك , كان فأيامنا وزير زمان وزير الوزرا.. وبيدو سوارت كل دار وعمارة.. وفراسو خبار الطير منين وفين وفوقاش طار وعلى شمن نخلة وقفات وشحال من حبة كلات وشحال من بيضة فرخات.. برقع ماتقشع.. لعبيه الزمان ودارت به أيام الرحمان.. ما بقى عندو باسبور وتلاوح فبلاد النصارى...
آولدي اضرب ضريبات خفيفات ولا تكثر في المرقة راك تولي شوها فالزنقة... اشرب وخبي الخاوي لا يحسدوك الجارسونات وموالين القهاوي. وقول الحمد لله عليها وزارة راه الخير إلى كثر تيعلم الجايع الدسارة.. "
أخرجه محبوب الدنفراوي في الجامع المائع في وصف حال الشعب الجائع.
إنتهى الحديث
التعليق على الحديث :
لهذه الأسباب انقرضت حرفة الوزارة واستبدلت بمهام خاصة يتهمم خلالها المهمم بالمهمة فينقل همومه إلى هموم الشعب فيزيده هم على هم ويبقى هو باري من المهمة لا أحد يمكن أن يتهمه بأي شيئ مرفوع الرأس عالي الهمة.
أعزائي القراء الله يخرج هاذ الحريرة على خير.. إذا صار ما صار راه خويكم غادي يتنفخ بالصوبا ويشتاق الحريرة .. ديرو بحق العشرة والتضويرة ولي ما لقى كلام الخير يقول فيا ما يدير ما دار مول الما فالقرا السلاوية.
تقاضت زلافتنا اليوم وإلى اللقاء غدا مع زلافة جديدة وأترككم مع هذه العيطة المغربية الأصيلة.
أدعوكم للاستماع لحلقة الأمس في إخراج إذاعي على الرابط التالي
www.moroccopost.net

انقر هنا لقراءة الخبر من مصدره.

مواضيع ذات صلة

حديث الزلافة الحريرية الرمضانية-12-

حديث الزلافة الحريرية الرمضانية -10-

حديث الزلافة الحريرية الرمضانية - 2 -

حديث الزلافة الحريرية الرمضانية -6-

حديث الزلافة الحريرية الرمضانية -9-