حديث الزلافة الحريرية الرمضانية-12-

حديث الزلافة الحريرية الرمضانية ""
في وصف جوج وضاما
وأحزاب الأفلام والدراما
(الحلقة الثانية عشر)
جائزة قناة الحريرة للأفلام الخاسرة

بطولة : حبوب الدنفراوي
سيناريو وحوار : محمد
القصة : سعيد
الإخراج : الوافي
اللقطات الخارجية : حميدو المسالي قبو
الموسيقى التصويرية : علال النفار
إنتاج: دار المصائب للأفلام المزورة

بعد العياذ بالله من الشيطان الرجيم والصلاة والسلام على سيدنا محمد سيد الخلق وخاتم النبيئين و المرسلين صلى الله عليه وسلم وعلى آله وصحبه أجمعين.

قرقبوا عليها سوارت الربح ولي ما صلى على النبي يمشي لجهنم.

أخواتي المتحزبات إخواني المتحزبين سلام الله عليكم ورحمته وبركاته

اليوم عواض الحريرة غادي نشربكوم صويبا خفيفة وضريفة بحالكم وخا انتما الله يسامحكم ما خفاف والو وثقال على القلب من كثر قوالبكم وفعايلكم النايحة.

أحزابنا الله يحضر السلامة دايرة كي العليق عرق لاصق فعرق .. نقلة وحدة .. ريحة وحدة .. أحزابنا الله يغفر لنا ولها دايرة كي الأفلام الهندية .. نفس القصة ونفس البطل.

أجي نرجعو للبداية ونشوفو أصل الحكاية من الطاق طاق حتى للسلام وعليكم.

كان يا ماكان فبلاد المغرب العجيب
كان الفرانساوي تيجمع ويحط فالجيب
وفي ليلة ما طلع ليها نهار
فاق الشعب على خبار
ماتسمعو غير كلام الخير
جا الإستقلال وعهد التحرير
وبدات المسرحية
دوك إلى كانو مناضلين
تلاوحو فالزناقي مرميين
وجماعة النفاق والمتملقين
ركبو سفينة الفوز و الناجين
وبين نفخ ونفخ
طاح الشعب فالفخ
وكشفات ألوان الحرية
علال ضرب يدو
وعبد الرحيم كلا ومسح فمو
وسيدي ومولاي
فرق على أهلو وولاد عمو
باسم النضال والثوابت الحزبية
قال الشعب يمكن غمامة وتفوت
وصبر مسكين حتي فات الفوت
وحبلات البلاد
بأغياء جداد