الحمام البلدي

فاش كان الواحد فينا صغير كانت على الأقل واحد التحميمة بلدية بين أسبوع وعشرة ايام كايأديها بغا أو كره، وغالبا نهار الخميس فالعشية حيت الأب غالبا كايستعد ليوم الجومعة بالسخرة ديال سكسو والجلابة بيضا وشي تحميمة قاد المقام وانت غادي تمشي معه مزرب.
كاتجمع الوالدة حويجات باك وحويجاتك فشي صرة وتديرهوم فالقفة بعد ماتدير ديالك لتحت وديالو لفوق باش مايتلفشي، كايزيد الوالد هو الاول وانت تابعو بشي ميكة فيها الصابون دالكف وتشابوان كادوم والمشطة دلعظام و محاكة حجرة والماكنة دلحسانة بالكوتشيا مينورا وجوج لتشينات مقاشرين والريحة ديال توليبان الصفرا، غادي موراه وكاره راسك لأن هاد التحميمة المسخوطة فيها غير المشاكل، مضيعة عليك شي ماطتش دالكرة فالحومة وملزوم عليك تجي للدار بعد ماتغسل ديريكت لأن الوالد غادي يجي، يشرب واحد البراد دأتاي ويتجبد قاطع فيك النفس.
انت غادي تابعو وكاتمنى توقع شي حاجة وترجعو بحالكوم، كاتخايل شنو يوقاع مثلا، كاتشوف فالسما وكاتمشي غير بشوية حتى كايفافيك الوالد :
_ وا انت زيد أ النمس راه تعاطلنا.
كاتوصلو لشي حمام خارج من جنابو دخان دالفرناتشي وشي صداع غارق للداخل وشي بييخو خارجين به كايلهت، كايدفع الوالد الباب وتدخلو للكلسة.
باش كايبدا باك كايحيد عليك الحوايج انت الاول، كايشوف فواحد الكسال شلاغمو هابطين من جوج جيهات حتى الكادومة، مفورمي وغليظ كيبحال السياف دهارون رشيد، كايفهام الكسال الإشارة ويشوف فيك ويفرنس بشي جوج سنان دالنوقرة، كيشيرلك الوالد تنوض والميكة فيدك وأراك على الفراجة:
انت داخل بشوية بعد مايدفع الكسال باب الحمام الثقيلة خايف لا تزلق وتطيح على قرفادتك والوالد كايخاطب الكسال من بعيد : _ واشوف معه مزيان راه موسخ.
تجلس تسخون شويا وتحاول تلعب ولا تغني ولا تمنظار فشي مخلوقات قدامك حتى يكون الكسال عمار السطولا وسياق البلاصة وكايضرب بالحكاكة فالارض، كايجي الوالد قبالتك ويتجبد يسخون، وباش يبين الكسال حنة يدو كايبدا بالحكان من لفوق وهو هواد ونازل عليك بالثقال ديالو باغي يسالي معك، وكايردد : _ سو سو سو أسس أسس أسس، ومرة مرة يصرخ : _ زيد لهنا….تقلب على ظهرك…. تقلب على كرشك….زيد لهيه، أ را يدك، أ را رجلك، وانت ضارب الطم كاتسنا تدوز هاد الكينتة على خير.
كايغسلك ويدير لك الصابون والشومبواني ويخرجك للكلسة وانت فرحان بالحرية هاد المرة.
انت كاتبرد وداير الفوطة على ظهرك كاتجبد اللتشينة الصغيرة المقشرة وكاتستمتع بها وكاتشوف فالناس كايلبسو عليهم ولوخرين عاد جايين وكاتسمع منهم مواضع مختلفة : عن الحرب والفلاحة والبيع والشرا والأمراض والأدوية والأعشاب والنسا والاستعمار ومحمد الخامس.
كايخرج الوالد باقي عرقان كايشلل، يزيد لعندك يلبس لك ويخلي الفوطة على راسك، يبوسك ويقولك :
_ بقى هنا ماتحركش حتى نخرج، تدير شي بسالة نخرج نزبر موك.