و في النمل برهان

مني كنت صغير كنت دائما كنلعب بوحدي فالسطح بحكم اني الابن الوحيد لظروف بيولوجية سوصيستحزاقية. من بعد ما كانعيا نقلب على شي اداعة سبانيولية بكسكاس معلق فالانطيرنا كنت كنبقا نتأمل فالنمل دايرين الصف و داخلين للجحر ديالوم هازين شي جثة ديال فراشة لاويا او شي حشرة اخرى باش يعشيو بها القبيلة ديالوم . كنت بعد المرات و بنية حسنة كنعاونوم و كنهز ديك الفراشة و كنحطها حدا التقبة ديال الجحر و كنت كنشوف التصرف ديالوم كانو كي تشاعترو فكل الاتجاهات و كي بقاو يتصاطحو مع باعضياتوم و كنبقا نضحك عليم و كنتخيل الحوار لي دار بيناتم مني كي تصاطحو .
النملة كتقول لنملة اخرى . و غير بشوية ابنادم واش مكتشوفشي؟ و لوخرا كتقولا سمحلي احبيبة را كنقلب على راجلي فهاد الدحاس بغيتو يخلصلي واحد التقطيعة ديال الثوب .
بعض المرات كنت كنحطلوم قطرة ديال الما كبيرة بحال شي فيضان شي غرق شي هارب شي كي فركل بحال لي ديرتلوم الطوفان ديال سدي نوح .و كنت ديما مع بالي كنتخيل الحياة ديالوم اليومية و الادوار القيادية فالمجتمع ديالوم ،، زعما واش عندوم الملك مثلا واش كيدورلو حفل الولاء بحالنا و الحاجة لكانت كتجيني غريبة مارا هي كيف كابانولوم حنايا قوم بنو ادم ،ربما كيشوفونا بحال شي كائنات عظيمة غير بصبع واحد نقدر نفلعص عائلة كاملة تماما كجندي اسرائيلي فشي حومة دالمسلمين غير بصبع واحد يقدر يسيفط عائلة كولا للجنة شهداء خالدين فيها ابدا و لا الظالين امين . بعد المرات كان كيغلب عليا طابع ديال الشر و كنقتل شي جوج و لا تلاتة باش نشوف ردة الفعل ديالوم. كتنوض شوية ديال الفتنة و لكن خسارة معنديش القدرات ديال سيدنا سليمان باش نسمع الشعارات و الهتافات ديالوم النضالية التي تطالب بسقوط الطغيان . و ما كانوش كي قومو بحتى شي محاولة ديال الثأر مثلا يتجمعو و يديرولي شي سراق الزيت فبراد داتاي او يخليوني حتى نكون ناعس و يديرو عمليات انتحارية داخل الاذن باش يصمكوني . لا شئ من هدا القبيل، حتى بقا كي أنبني الضمير ديالي و وليت كنجيبلوم الفتاوت ديال الخبز حتى نعاندوم و كنت نستمتع مني كنشوفوم كي ياكلو من يدي ..
دازت الايام و دخلات عليا المكتسبات ديال الزمن. سجلني الوالد الله يرحمو فالجمعية الاسلامية مع الدراري دالحومة و كنا كنمشيو صباح كل يوم احد كي ديرونا افلام هندية ديال رونجيطا في صراعه مع الفقر و الحب و الكبت و الامبريالية. ما عجبنيش ديك الشي ديالوم نهائيا و كنعرف شي صحابي مازالين معاهم الى يومنا الان و مني كنقارن راسي معاهم كنحس براسي انسان سوي عقليا و حتى مع سيدي ربي ممزبلاشي بحالهم . عنكون ديرت شي 100 علاقة غير شرعية ناجحة و علاقة شرعية واحدة فااشلة و شي غشاء بكرة او جوج مع شرب الخمر بطبيعة الايمان اما هما دارو كثار مني و كملوها و جملوها تقدمو للانخابات و نجحو للاسف .
داز الوقت وليت كنشم تحت يباطي وليت كنجلس فالقهوة حتا انا و نعمر الشبكة بعد ما قرينا صفحة من القلب الى القلب وتفرجنا في الجزيرة حتى تكهمنا بالدمايات و بالافكار لي كتقول باننا احسن امة و لوخرين هما لي ولاد الحرام و بالروح بالدم نفديك يا زعطوك . من بعد ما نجحت فالباك ب 11،38 فرحو دارنا بيا و سحابلوم را عاد النقطة عندير بيه ميدسين و بقيت كنسمع شي وحدين كي هضرو على شي اسماء ديال شي مدارس غريبة ها بيزا ها لوسنيجي ها الطيزا و كينا شي وحدين مازالين فالقهوة جالسين شوماج من بعد ما خرجتلوم خاوية و طلعو الصبع في طيزه .
الحاصول ، داز الوقت و كبرنا و انا دابا جالس فواحد البار في قلب العاصمة الفرنسية كنشرب النبيد العتيق و جات واحد العنكبوتة باغا تاكولي الطابا ديالي و انا نتفكر شنو كانت كدير للنمل الابرياء. خشيتها فكاس ديال الروج باش نشوف كيفاش ديرا السكرة ديال العنكبوت و شوية و هي تجيني افكار شريرة قلت عنعمر الكاس لي فيه الحشرة و غادي نعطي لهاد الاسرائيلية لي حدايا تشرب انتقاما للعرب و لكن مقدرتش حيث رغم الترسبات ديال هاد السبيد لي عاودتلكم كنبقى انسان حنين و مسالم و طابع الحب كي سبق عندي . شاديت فاليد ديال اليهودية بالله و قوتلا بالفرنسية .
Dite moi belle demoiselle c'est quoi la chose la folle que tu as envie de faire maintenant ?
Elle me répond (complètement bourrer )
Elle me tiens par le coup sauvagement elle me dit : J'ai envie te faire lamour devant tout le monde et maintenant et elle continue de rire bêtement.
قربت لعندا و قتلا منقدرشي الضرافات، تعلمت من النمل شي اخلاق زوينة. ما عمري ما شفت شي نملة تمارس الجنس مثلا امام الملئ
اليهودية ما فهمت تا وزة و بقات كتشوف فيا مشلوطة.
انا :
GARÇON. ENTRE DEUX BIÈRES S'IL VOUS PLAÎT.